14 август куни Туркияда лидери Президент Ражаб Эрдўғон бўлган исломчиларнинг Адолат ва Тараққиёт Партияси ўзининг 16 йиллигини пойтахт Анқарадаги парклардан бирида СССР коммунистлариникидан қолишмайдиган ўта ҳашаматли байрам маросими билан нишонлади. Табиий, байрамнинг марказида доҳий Ражаб Эрдўғон турарди.

Бу байрам билан боғлиқ бўлган қизиқ хабарларда бири – Ражаб Эрдўғоннинг шахсий таклифига қарамасдан партиянинг асосчиларидан, экс-президент Абдуллоҳ Гул (расмда) қандайдир баҳоналар кўрсатиб, байрам маросимида қатнашмаганидир. Бу ҳам етмагандек, у ўз табрикномасида партия ўзининг қурилиш вақтида эълон қилинган қадриятларга қайтиши кераклигини урғулабди. Бу хабар “Жумҳурият” газетасида берилган.

У ўз табрикномасида 16 йил ичида партиянинг қилган ишларини олқишлаган, ўтган йилги давлат тўнтаришига уринишни қоралаган ва шу билан бир қаторда танқидий огоҳлантиришлар беришдан ҳам тортинмаган. Мана унинг табрикномасидаги калит жумла: “Адолат ва Тикланиш Партияси ўз қурилиш йилларидаги қадриятлар ва сиёсатга қайтиб, ўз қадриятларини универсал демократик критерийлар доирасида таҳлил қилиши ва шу йўлда давом этиши керак.”

“Бирлик” Партиси лидери Абдураҳим Пўлат шок терапияси усуллари билан Ражаб Эрдўғон ва унинг Адолат ва Тараққиёт Партияси улуғ Отатурк яратган дунёвий/секуляр Туркияни қайтадан исломлаштириш ва ўрта асрларга судраш йўлига тушганлари, Турк Дунёси тушунчасини ҳам йўқ қилаётганлари ҳақида гапирмоқда. У ўз фикрларини шу йил 15 апрель ойида Туркияни яккаҳокимлик давлатига айлантириш бўйича ўтказилган референдум олдидан турк халқига ёзган чақириғида ҳам айтган ва бу чақириқни Туркия Президентининг саройига ҳам жўнатган эди. Абдуллоҳ Гул айнан шу фикрларни ўта нозик тилли, ҳамма ҳам даҳол тушунолдмайдиган имо-ишоралар билан қайтармоқда, холос.

Кўрамиз, Ражаб Эрдўғон ўзининг узоқ йиллардан бери сафдоши бўлган Абдуллоҳ Гулнинг огоҳлантиришларига қанчалик қулоқ солади.

Аммо, бир нарса маълумки, Ражаб Эрдўғон ва унинг атрофидаги ислом фанатикларини фақат Абдураҳим Пўлат ва Абдуллоҳ Гул бу йўлдан қайтаролмйдилар. Турк Дунёси лидерлари бу чақириқларга қўшилишлари ва Ражаб Эрдўғоннинг Туркияни исломлаштириш учун қилаётган ҳаракатларини қўллаб-қувватламасликларини очиқча эълон қилишлари керак.