Мустақиллик тантаналарининг 25 йиллиги арафасида Ўзбекистон ҳукумати мамлакатнинг қўшни Қирғизистон билан чегарасини бир томонлама ëпиб қўйди. Қирғизистон давлат Чегара хизмати эълон қилган баëнотга кўра¸ ўзаро чегаралар 22 августдан ëпилган. Айни пайтда қирғиз чегарачилари¸ чегара ëпилишидан олдин Ўзбекистон ҳудудига ўтган қирғизистонликларнинг чиқишига изн берилганини ҳам билдирибди.

Аммо¸ хорижликлар¸ дипломатик миссия ва халқаро ташкилот хизматчиларининг чегарадан ўтиб-қайтишига таъқиқ йўқ эмиш ва чегара мустақиллик байрамидан сўнг кучайтирилган тизим бекор қилиниши билан очилар эмиш.

Чегараларни ёпиш буйруғи Ислом Карим тарафидан берилганига шубҳа йўқ. Аммо, у бечоранинг ҳолига қаранг. Ўзи тиш-тирноғи билан қаршилик қилишига қарамасдан, “Бирлик” ва бошқа республикалардаги миллий-демократик ҳаракатларнинг кураши натижасида Совет Империяси парчаланди ва Ўзбекистон мустақил давлат бўлди.

Энди Ислом Карим ўзини мустақилликнинг отаси қилиб кўрсатишга уриниш билан овора. Ўзбекистон мустақиллик йиллари тушукинликка тушиб, ўзбек профессорлари қозоқ дворникларидан кам маош оладиган ҳолга туширилганини яширишга уриниб, Ўзбекистоннинг буюклиги, ривожланишнинг “ўзбек модели” дунё тарафидан тан олинганини гапиради.

Аммо, мустақилликнинг 25 йилига келиб, ўзбеклар миллат сифатини, Ўзбекистон давлат сифатини йўқотиб бўлганини исботлаб, шундай улуғ байрам куни арафасида чегараларни бекитмоқда, Ўзбекистон мустақил қамоқхона эканлигини кўрсатмоқда.

Расмда мустақиллигимизнинг ҳақиқий рамзи бўлган воқеани, “Бирлик” 1989 йили Навоий кўчасида уюштирган, чеки кўринмаётган муҳташам намойишни кўрмоқдасиз.