АҚШ ва унинг бошчилидаги коалицияга кирувчи Европа давлатлари Ироқ Шом Ислом Давлати номли гуруҳни йўқ қилиш учун ҳаво ҳарбий кучларини ишлатиш билан чекланмоқчи эканликлари ҳаммага маълум. Аммо, пиёда жангчиларсиз бу мақсадга етиб бўлмаслиги ҳам маълум.

Ғарб бу масалада курдларнинг жангариларига таянмоқчи эканлигини аввал ёзган эдик. Ироқ Курдистон Ўлкасининг раҳбарлари Суриянинг Туркия билан чегарасидаги Кобани шаҳридан ИШИД уриб чиқариш учун ўз аскарларини у ерга ўтказиб юборишни сўраб Туркияга мурожаат қилдилар.

Кобани бир неча йилдан бери Башар Асад эмас, Суриялик курдларнинг расман Демократик Бирлик Партияси деб аталадиган, аслида норасмий қуролли армиясининг назорати остида эди. Ҳозир бу армия бир ойдан бери Кобанида урушмоқда, аммо ИШИДни якка ўз енголмаслиги кун сайин маълум бўлиб бормоқда.

Бундай шароитда ироқли курд аскарлари бу ерга келса, бу минтақа тамомийла курдлар назорати остига ўтиб кетишини истамаган Туркия - курдларнинг ўз ҳудудларидан Сурияга ўтиши йўлида турли тўсиқлар чиқара бошлади. Ниҳоят 150 курд аскарининг ўтишига рухсат ҳам берди. Аммо, Башар Асадга қарши курашаётган суриялик араб гуруҳлари тузган Озод Сурия Армиясининг 1 минг 200 аскарига ҳам Туркия орқали Кобанига ўтиши учун рухсат берганини очиқлади.

АҚШ дарҳол бу қарорни олқишлади.

Аввал айтганимиздек, ҳар ким ўз ўйинини ўйнамоқда.