10 April 2010
21:24 - Олмосбек Атамбаев Россия Бош вазири билан учрашди, Бишкекга БМТ Бош котибининг махсус вакили келди
Қирғизистоннинг давлат ахборот агентлиги “Кабар” тарқатган хабарга кўра, муваққат ҳукумат Бош вазирининг ўринбосари Олмосбек Атамбаев кеча Россия президенти Владимир Путин билан учрашиб, музокаралар олиб борган. У бугун Бишкекга қайтади.

Ҳали мақоми қонунийлаштирилмаган ҳукумат раисининг ўринбосари билан Россиянинг ҳақиқий хўжайини учрашгани аниқ кўрсатмоқдаки, Қирғизистонда ҳокимиятни қўлга олган кучларни Россия қўллаб-қувватламоқда. Путиннинг мақсади шу йўл билан Россиянинг Марказий Осиёдаги ролини ошириш эканлиги шубҳасиз ва тушунарли. Қирғиз мухолифатининг бу ўйинга киргани эса аянчлидир.

Айни агентлик тарқатган бошқа хабарда айтилишича, ҳозир Венеда бўлган БМТ Бош котиби Пан Ги Мун Қирғизистонга ўз махсус вакилини жўнатган. Бу - БМТнинг Европа Иқтисодий Комиссиясининг директори Ян Кубишдир. У яқинда Пан Ги Мун билан биргаликда Бишкекда бўлган эди. Бугун кечаси у яна Бишкекга келди.
« Олдинги хабар Хабарлар рўйхати Кейинги хабар »