10 April 2010
19:47 - Польша президенти Лех Качиньский Смоленскда авиаҳалокатда ҳалок бўлди
Рус оммавий ахборот воситалари бугун эрталаб соат 10:56 да Польша президенти Лех Качиньскийнинг учоғи Смоленск аэропортига қўниш арафасида ҳалокатга учраганини хабар қилдилар. Президентнинг ўзи, унинг хотини ва уларга ҳамкорлик қилаётган 85 кишилик ҳайъат ҳалок бўлган. Учоқда ҳаммаси бўлиб 124 киши бўлгани ва уларнинг ҳаммаси ҳалок бўлгани ҳам айтилмоқда.

Польша президенти Лех Качиньский ва унинг ҳайъати 1940 йилда Смоленск вилоятидаги Катинь қишлоғида Совет ҳукуматининг қарори билан отиб ташланган 19 минг поляк харбий офицерининг хотирасига бағишланган маросимида иштирок этиш учун келишаётган эди.

Маълумки, 70 йил аввалги бу қонхўрлик Россия-Польша муносабатларини доим бузиб келинишига асос бўлмоқда. Польша Россиядан бу оммавий қотиллик юзасидан кечирим сўрашни истайди, руслар буни хоҳламайди.

Бугунги хабарларда айтилишича, Смоленск аэропорти оби-ҳавонинг ёмонлигини баҳона қилиб, Лех Качиньскийнинг учоғига қўнишга рухсат бермаган ва уни 200 км узоқликдаги Минск шаҳрига жўнатишга интилган. Аммо, учоқ экипажи шу ерга қўнишга ҳаракат қилган ва 3 ёки 4-чи марта қўнишга ҳаракат қилинаётганда, учоқ аэропортдан 2 км нарида дарахтларнинг учига тегиб кетиб қулаб тушган.

Бу воқеа Польша-Россия муносабатларини янада ёмонлаштириши табиий. Чунки, учоқ ҳалокатида Смоленск аэропорти ходимларининг, аслида, уларнинг орқасида турган рус махсус хизматларининг роли бўлиши мумкин. Улар Польша ҳайъатини Катинда бошланадиган маросимга кечиктиришга ҳаракат қилишган бўлишининг эҳтимоллиги катта.

Польша қонунларига кўра, президент ўз вазифасини бажаролмай қолган ҳолларда парламент спикери автоматик равишда президент вазифасин вақтинча бажарувчи бўлиб қолади. Мамлакат парламенти – Сеймнинг спикери Бронислав Коморовский ҳозир шу мақомга эга бўлди ва мамлакатда 7 кунлик мотам эълон қилди.
« Олдинги хабар Хабарлар рўйхати Кейинги хабар »