09 April 2010
21:10 - Бишкекда мотам, вақтли ҳукумат лидерларидан бири Москвага таъзим қилишга кетди
Бишкекда ҳукумат-мухолифат тўқнашувларида ўлган 74 кишининг хотирасига мотам қилинмоқда. Икки кун аввал юз берган тартибсизликларнинг қурбонлари ташкилий равишда бир ерда эмас, ҳар бир кишининг ўзи яшайдиган жойида дафн этилади. Уларнинг асосий қисми Бишкек ташқарисидан келганлар.

Қирғизистоннинг расмий давлат агентлиги “Кабар”нинг пешинда тарқатган хабарига қўра, вақтли ҳукумат Бош вазирининг ўринбосарларидан бири, Социал-демократик партия раиси Олмосбек Атамбаев бошчилигидаги делегация бугун эрталаб Москвага музокаралар ўтказиш учун учиб кетган. Дунё бўйича ҳеч ким тарафидан тан олинмаган вақтли ҳукумат делегациясининг Россияга кетиши – Қирғизистондаги давлат тўнтариши Москванинг ёрдамида уюштирилганининг яна бир исботи бўлмоқда.

Буни яхши тушунган вақтли ҳукумат ўзини оқлаш учун мантиқсиз баёнотлар қилишгача борди. Масалан, Бош вазирнинг бошқа ўринбосари, Ота-Макон партиясининг лидери Умурбек Текебаев русларнинг gazeta.ru сайтига интервью берар экан, ақлга сиғмайдиган гаплар гапирди: Россия МДҲ мамлакатларига нисбатан сиёсатини ўгартирган эмиш, энди у ҳукумат билан тенг даражада мухолифат билан ҳам мулоқот қилармиш. Русларнинг Бишкек яқинидаги ҳарбий базасидаги аскарлар тинчлик ўрнатувчи куч сифатида Қирғизистоннинг ички ишларида иштирок этишлари мумкин эмиш.

Ўзини демократ деб кўрсатишга уринаётган қирғиз мухолифати Путиндек одамга суяниши – Қирғизистонда сиёсат иккиюзламачилик ботқоғига ботганини кўрсатади.
« Олдинги хабар Хабарлар рўйхати Кейинги хабар »