22 January 2010
06:16 - Васила Иноят АҚШ элчиси Ричард Норландга: “Мартин Лютерникига ўхшаган оташин нутқ “Бирлик”чилар овозидан ҳам янграган”
19 январь куни АҚШнинг мамлакатимиздаги элчиси Ричард Норланд ўз резеденциясида “Мартин Лютер Кинг куни” муносабати билан қабул уюштирди. Қабул маросимида Ўзбекистон инсон ҳуқуқлари “Эзгулик” жамияти фаоллари, мамлакатимиздаги ноҳукумат ташкилотлари вакиллари, ҳуқуқ ҳимоячилари ва журналистлар иштирок этди. Меҳмонлар қаршисига чиққан АҚШ дипломати Мартин Лютернинг Америка тарихи, жамияти қурилишидаги аҳамияти хусусида гапирди. Ирқий камситишларга қарши кураш тимсолига айланган бу шахс номи билан боғлиқ куннинг алоҳида тантана қилинишини таъкидлади.

Маросимда Мартин Лютер Кингнинг “Бир орзуим бор менинг” номли нутқи акс этган видеофильм намойиш қилинди.

Маросим давомида АҚШ элчиси Ричард Норланд билан сўзлашган “Бирлик” Партияси Бош котиби, “Эзгулик” жамияти раиси Васила Иноят дипломатга Мартин Лютернинг оташин нутқи яқин ўтмишдаги кураш йилларини, хусусан, “Бирлик” Партияси лидери Абдураҳим Пўлатнинг собиқ Ленин майдонидаги чиқшларини эслатганини таъкидлади. Ўз ҳайратини яширмаган элчи жаноблари “Бирлик”нинг мустақиллик учун кураш йиллари ва Абдураҳим Пўлатнинг айни вақтдаги фаолияти билан қизиқди. Васила Иноят ўз сафдоши ва партиянинг амалга оширган ишлари хусусида сўзлаб берди.
« Олдинги хабар Хабарлар рўйхати Кейинги хабар »