Жаҳоннинг жуда кўп агентликлари Хитойда “бир оила – бир фарзанд” сиёсатидан воз кечилгани, ҳар бир оилага энди иккитадан фарзанд кўриш рухсат берилганини айтмоқдалар. Аммо, Синьхуа агентлигининг хабари бошқачароқ.

Маълум бўлишича, 29 октябрь куни Хитой Коммунистик Партиясининг Марказий Комитети ҳар бир оила иккитадан фарзандга эга бўлишига рухсат бериш кераклиги ҳақида қарор чиқарган. Хитойда коммунистларнинг дегани деган, демак яқинда мамлакат парламенти керакли қонунни чиқарса керак.

Хитойда аҳолининг тез ортиб бориши ва бунча одамни боқиш учун етарли имкониятлар бўлмагани сабабли, 1979 йили “бир оила – бир фарзанд” сиёсати кучга кирган эди. Тўғри, майда миллатларга, қишлоқда яшаб, биринчи фарзанди қиз бўлганларга ва яна баъзи бир гуруҳларга иккинчи фарзанд кўриш рухсати берилганди. Бу қонунни бузиб иккинчи фарзанд кўрганларга оила аъзоларининг бир неча йиллик даромадига тенг жарима солинарди.

Авваллари Хитойда ҳар бир аёл ўртача 5,8 фарзанд кўрар экан, бу сиёсат кучга киргач 1,8 фарзанд кўра бошлабди.

Аммо, шунча йилдан кейин мамлакатда қарияларнинг сони ортиб, меҳнатга лаёқатлиларнинг сони камайиб кетган. Бунинг устига, анчагина оилалар қиздан кўра кўпроқ ўғил куриш ҳавасида бўлиб, ўғилли бўлиш учун турли йўлларни топишгани сабабли, хотин-қизларнинг сони эркаклардан 30 милн кам бўлиб қолибди, демак, хотин ололмайдиган ўн миллионлаб эркаклар бор.

Шуларни ҳисобга олган Хитой коммунистлари “бир оила – бир фарзанд” сиёсатидан воз кечмоқчилар.

Ҳозир Хитойнинг аҳолиси 1,4 миллиардга яқин бўлиб, яқин йилларда аҳолиси ҳозир 1,3 млрд атрофида бўлган Ҳиндистон хитойлардан ошиб кетиши кутилаётганди. Демак, энди бундай бўлолмайди.