23 июль, яъни пайшанба куни кечқурун Тошкентга AҚШ Дaвлaт котиби ёрдaмчисининг биринчи ўринбосaри Ричaрд Ҳоуглaнд келгани, у жума куни ўзбек расмийлари билан икки томонлaмa сиёсий мaслaҳaтлaшувлaрдa иштирок этиши айтилганини аввалги хабарларимизда билдирган эдик. Озорбайжонда тарқатлиган хабарлардан маълум бўлишича, Ричaрд Ҳоуглaнд Тошкентдан олдин Бокуда ҳам тўхтаган экан. У ердаги хабарлар умумий гаплардан иборат бўлиб, Ричaрд Ҳоуглaнд Озорбайжон иқтисодидаги ўсишларни мақтагани, “Ипак йўли” лойиҳаси Озорбайжон учун ҳам фойдали бўлишини урғулагани айтилади.

Ўзбекистон режимининг қўғрчоқ ахборот воситалари хабар беришича, Ричaрд Ҳоуглaнд кеча жума куни Ўзбекистон ташқи ишлар вазири Абдулазиз Комилов билан учрашибди. Учрашувда АҚШнинг мамлакатимиздаги элчиси Памела Спратлен ҳам қатнашган. Хабарларда уларнинг биргаликда тушган расмлари ҳам йўқ. Умумий шаклдаги хабарларда америкалик меҳмоннинг гапларигина келтирилади. У Ўзбекистон иқтисодининг ўсишини эмас, иқтисоднинг барқарорлигини мақтабди ва яна ўша “Ипак йўли” минтақада тинчлик ва иқтисодий фаровонликнинг асоси бўлишини урғулабди. Тўғри, у Ўзбекистонда Озорбайжонда каби иқтисодининг ўсиши борлигини гапиролмасди. Шу сабабдан иқтисоий барқарорликни тилга олибди. Аммо, барқарорлик – Озорбайжон, Қозоғистон ва Туркманистонларга нисбатан қашшоқлигимизнинг барқарорлиги эканлигини, табиий, айтмабди.

Ўзимизнинг вазир нима дегани хабарларда умуман тилга олинмайди. Аммо, Ричaрд Ҳоуглaнднинг “Афғонистонда хавфсизлик вакумига келсак, мен бу каби ташвиш ва хавотирликларни тушунаман. Мен бундай вакум бўлишига ишонмайман. АҚШ ва халқаро ҳамкорларимиз Афғонистонда керак бўлган ҳарбий оперцияларнинг катта қисмини вождонан бажариб бўлдилар” дейишига қараганда, айнан Абдулазиз Комилов Ўзбекистон ҳукуматида бундай хавотирлик ва ташвиш борлигини айтган, меҳмон эса керакли жавоб билан уни хотиржам қилган.

Қолаверса, Абдулазиз Комилов ўз хавотирликларига жавобни “Ҳаракат” Агентлигининг сайтидан қидирса эди, у ва хўжайини Ислом Карим аввалроқ хотиржам бўлган бўлардилар. “Ҳаракат”нинг эксперт ва мухбирлар АҚШ яқин орада Афғонистондан чиқиб кетмаслигини АҚШ бу мамлакатга қўшинларни олиб кирган вақтдан бери гапириб келмоқдалар.

Хуллас, Озорбайжон ва Ўзбекистонда тарқатилган хабарлардан келиб чиқсак, Ричaрд Ҳоуглaнд Кавказ ва Марказий Осиё бўйлаб шунчаки расмиятчилик учунгина саёҳат қилмоқда. Балки, сир тутилаётган бошқа мақсадлар бордир. АҚШнинг ҳаёли Украина ва Яқин Шарқда экан, буни тушуниш мумкин.