27 March 2023
17:05 - Юсуф Жума: КЎЗ - КЎЗ ЁЛҒОНДАНДИР, БИЛИМ ТАНГРИДАН…
Очунни кезиб тур, кўз - кўзга кўра
Эркиндан эркиндир бесаноқ ўлка.
Қай йўл эркка элтар? Барчадан сўра,
Ҳатто полислар ҳам қисади елка.

Сўра, қайси йўлдан етса бўлади,
Мен чанқоқдан - чанқоқ ҳақиқат сари?!
Қайда тўғрисини айтса бўлади,
Еру - кўкни қамраб чақмоқ сингари?!

Юртлар кўп, йўллар кўп - теп-текис равон,
Озодликка, ҳаққа элтмас ҳеч бири.
Бари ишхонага боради ,аён,
Борар гўристонга, сотилар гўри…

Ақлдан озмасдан ўйлагин энди,
Дейсан чиндан чинда тўхтаминг теран:
Кўз - кўзда Озодкент бошқача эди,
Кўрганда Озодкент бошқача экан…

Нарсалар мос келмас кўз-кўзларига,
Кимсалар мос келмас кўз-кўзларига.
Кўз - кўзлар кўзлари юмиқлар учун,
Ўлкалар мос келмас кўз-кўзларига…

Қайси кентда кўча тўла адолат?!
Қайси кентда кўча тўла эрк бордир?!
Еридан то кўкигача разолат,
Хор бўлса ҳақиқат, озодлик хордир.

Ўрганар кўзсизлар кўз-кўздан, ойдин,
Ўрганар очиқкўз билимдан теран.
Кўз-кўзда бошқача эди бу очун,
Кўрганда бу очун бошқача экан…

Эсли ким - ўрганиш йўлига кирган,
Фарқлаган эслини, эсдан айридан.
Кўз-кўздан ўрганма,билимдан ўрган.
Кўз-кўз ёлғондандир, билим Тангридан.

2023 йил, 27 март.

* * * * *

Ўзгалар юкини кўтарсам бир оз,
Бу учун ёзмагин савоб, илтимос!
Ҳеч не тиламайман бировлар боис,
Ўзингдан ёз, Тангрим, чексиз - чексиз ёз!!!

2023 йил.

* * * * *

Қўлла деб қўллашига шубҳанг бўлса, демак, зор,
Тангрига ишончингда шубҳасиз шубҳаси бор.
Қўллаши шубҳалидир шубҳа билан сўрасанг,
Шубҳасиз сўраганни шубҳасиз қўллайди - ёр.
« Олдинги хабар Хабарлар рўйхати Кейинги хабар »