10 April 2023
19:17 - Юсуф Жума: ЕР УСТИДА СЕВГИ ҚОЛСИН, КЎК УСТИДА ТАНГРИ ҚОЛСИН….
Йиллар ўтди дема, ўтса - ўтгандир,
Ўзига сиғмаган нордек чопаман.
Ёшлигинг ўтмасдир - болдек қотгандир,
Сендан ёшлигингни излаб топаман.

Йиллар тўлин ойни эта олмас хор,
Ўн тўрт кунлик ойим, кўркинг тепадан.
Ғунча дудоғингда ўн тўрт ёшинг бор,
Сендан ўн тўртингни излаб топаман.

Оғзинг йўқ - боллари ёпишиб қотган,
Қотганингда қотиб, болин қопаман.
Ботган барча кунлар юзингга ботган,
Шундан ўн бешингни излаб топаман!

Белинг йўқ - йўқ нарса эскирадими?!
Жон ипим - белбоғинг, йўқни ёпаман.
Яралмаган чоғинг менга жон берар,
Ҳали йўқ чоғингни излаб топаман.

Тангри - йўқ белингдай - йўқ белингдадир,
Топган жойи зўрдир - мен топинаман.
Ўн олти ёшлигинг кокилингдадир,
Бошдан - оёғингдан излаб топаман.

Сенда ўн саккиздан юқори ёш йўқ,
Кўкдан юқорисан, сенга ҳўпаман.
Ҳар бир ҳужайрангдан қутлуқдан қутлуқ
Ўн саккиз ёшингни излаб топаман.

Бўйинг - ўн тўрту ўн саккиз ораси,
Ўзига сиғмаган норман, чопаман.
Тангри билан менга яшаш чораси -
Сенсан - сендан чора излаб топаман!!!

2023 йил, 8 апрель.

* * * * *

Тангрим, очун остин - устун -
Ёлғонлар, фитна, вируслар.
Инсониятдан кетмоқда -
Шундоқ ҳам йўқ бўлган эслар.

Дунё шундоқ алғов - далғов,
Одамзот тентаклашмоқда.
Лек сўзим Ўзингдан - олов
Севгимдир юксаклашмоқда.

Нечун мени сийлаяпсан,
Тилим билан сўйлаяпсан?! -
Ҳатто отинг унитилар,
Сен эртангни ўйлаяпсан.

Инсонлар озмоқда эсдан,
Оғмоқда ору - номусдан.
Тентакликдан одамзотни
Севги қайтаради эсга.

Севгини оширар жини,
Севги этадику жинни?!
Сўзим - севгику, эслатар -
Чинакам отингку севги?!

Одамзот сўзимни эслар -
Севгини - Ўзингни эслар.
Севги қутқарар очунни -
Йўлингни - изингни эслар.

Ёруғ очун нодонликдан,
Ёмонликдан айри қолсин!
Ер устида Севги қолсин,
Кўк устида Тангри қолсин!!!

2023 йил, 8 апрель.

* * * * *

Бир тан бўлиб,бир жон бўлиб,
Бирлашайлик, кел, жон, бирик.
Сенга ўт жонимни тўкай,
Менга оташ болингни тўк!

Еру - кўкнинг косалари
Тошар - юқингдан юқса юқ.
Лек болинг чанқоқлигимни
Қондиришга бир юқча йўқ.

Мен сенга оташ этайда
Боримни тўкай, оташ,уқ.
Сен менга оташ этгинда
Борингни тўк, борингни тўк!!!

Бирлашса чучукларимиз -
Турмуш чучукдан ҳам чучук.
Кўшкимдан азиз деб кўчар
Шу чучукка Тангрим - Буюк!!!

2023 йил, 8 апрель.
« Олдинги хабар Хабарлар рўйхати Кейинги хабар »