Чаёнлар инидан кўчиб, илон инига келибман,
Чаёнлар нишидан безиб, илон нишига келибман.
Тулкилар инидан кўчиб, сиртлон инига келибман,
Тулкилар тишидан безиб, сиртлон тишига келибман.

Саноқли соқчидан безиб, бесон соқчига йўлиқдим,
Сўқирлар овлар деб, кўзли милён овчига йўлиқдим,
Қор кўчкиси босмасин деб, кўк кўчкисига йўлиқдим,
Аждарнинг думидан кўчиб, аждар бошига келибман.

Ўзи келтирдими, демак, шу ерда бўлишим керак,
Ўзи билан катталашди, Ўзи йўқми - кичик юрак.
Жон томиримда бел боғлаб, жанг этмасам, эрк, ҳақ - чўпчак,
Тангрининг кичик ишидан катта ишига келибман!!!

2023 йил, 30 январь.

Ўтмишда тўғилганимда
Очуннинг хоқони эдим.
Ер юзи Қорачуқ эди -
Ягона Туроним эди!

Қоним томирга сиғмасди,
Оқизар эдим ўзандан -
Жайҳун жойи хуним эди,
Жайҳун тўғилган ўшанда!

Сайҳун ҳам шунда тўғилган -
Тошган хуним - сойи хуним.
Қуёш ҳам шунда тўғилган -
Қонимнинг оташи - куним.

Шу боис Хун отин олдим,
Очунни хун этиб олдим.
Эрку чинни, чин севгини -
Чинакам дин этиб олдим.

Тағин тўғилдим, эй,сулув,
Кел,қонимнинг ўзани бўл!
Оташимнинг осмони бўл,
Қуёши бўл - гулхани бўл!

Сени ҳам этайин Жайҳун,
Сени ҳам этайин Сайҳун.
Сени ҳам қуёш этайин,
Кел,сени ҳам этайин кун!…

2023 йил,1 февраль.

Нодонман, лек менга ўргатма, нодон,
Сендан билағонман, чунки эр хоқон
Боболарим қули боболарингдан
Чексиз доно бўлган - чексиз билимдон…

2023 йил, 1 февраль.