13 December 2018
09:21 - АҚШ Давлат Котиби Майк Помпеонинг яна бир зиддиятли баёноти ҳамда “Бирлик” Партиясининг жарчиси бўлган “Ҳаракат” Агентлигининг таҳлил ва таклифи
АҚШ Давлат Депаратаментининг сайтида 11 декабрь куни Давлат Котиби Майк Помпеонинг “Диний Эркинликлар бўйича Билдириш” деб номланган баёноти эълон қилинибди. Қисқа баёнотда айтилишча, у 2018 йил 28 ноябрда Бирма, Хитой, Эритрея, Эрон, Шимолий Корея, Покистон, Судан, Саудия Арабистони, Тожикистон ва Туркманистонни 1998 йилда қабул қилинган халқаро диний эркинликлар актига асосланиб, жиддий хавотирга сабаб бўлаётган давлатлар рўйхатига киритибди. Комор ороллари, Россия ва Ўзбекистон эса, бу рўйхатдан чиқарилиб, ўз вақтида диний эркинликларнинг жиддий бузилишлари»га йўл қўйган ёки бундай нарсаларга бепарво қараб келган ҳукматларнинг махсус кузатув рўйхатига ўтказилибди.

Ал-Нусра Фронт, Ал-Қоида, Ал-Шабаб, Боко Ҳарам, Хуситлар, ИШИД, ИШИД-Хорасан ва Толибон жиддий хавотирга сабаб бўлаётган ташкилотлар рўйхатига киритилибди.

Майк Помпео шу йил июль ойида пойтахт Вашингтонда 85 давлат ва 400 фуқаровий жамият ташкилотлари вакилларининг иштирокида тарихда биринчи марта инсонларнинг диний эркинлигини таъминлаш бўйича Вазирлар Конференцияси ўтказилганини ҳам эслатган.

Жойи келгани учун биз ҳам эслатишимиз керакки, дейди мухбиримиз, жаноб Помпео тилга олган Конференция Потомак (Вашингтон олдидан ўтадиган дарёнинг номи) Декларацияси қабул қилгани ҳақидаги хабарга “Ҳаракат” Агентлиги 28 июлда шундай таҳлил берганди:

* * * * *

Бу Декларацияда ҳамма динларга тўла эркинлик бериш шартлиги урғуланган. Майк Помпео дин эркинлиги Президент Доналд Трампнинг сайловолди ваъдаларидан бири эканлигини, ҳозир Доналд Трамп ва унинг тақими ўша ваъдаларни бажариш ҳаракатида эканлигини алоҳида урғулабди. Бу нарса - масхарабозликдир. Чунки, айнан Доналд Трамп сайловолди кампанияси даврида мусулмонларни АҚШга киритмаслик ваъдасини берган ва президент бўлгандан кейин бир неча марта мусулмонларнинг АҚШга келиши йўлида тўсиқлар қўйувчи қонун ва қарорлар имзолган, бироқ АҚШнинг судлари унинг қарорларини бекор қилишган эди.

Аммо, Конференция ва гўёки унда қабул қилинган Декларациянинг асосий масхарабозлиги бошқа нарсада. Қаранг, Декларацияда ҳамма динларга тўла эркинлик бериш айтилмоқда. Бошқа динларни қўйиб турайлик ва Ислом дини масаласини кўрайлик. Ислом динига кўра, мусулмонлар Шариат қоунлари билан яшашлари керак. Шариатга кўра эса, мусулмон эркаклар 3 та хотинли бўлишга ҳақлари бор, майда ўғриларнинг кафти кесилиши, каттароқ жиноят қилганлар тош бўрон қилиб ўлдирилиши керак. Бундан ҳам муҳими, давлат исломий бўлиши, исломий давлатлар Халифаликка бирлашиши, келажакда бутун инсоният мусулмон бўлиши керак. Ҳозир террорист деб тан олинган Ал-Қоида, Толибон, ИШИД ва бошқа ташкилотларининг мақсади Ислом динининг айнан шу талабларни ҳаётга тадбиқ қилиш-ку.

Бу масхарабозлик халқасидан, тўғрироғи, боши берк кўчадан чиқишнинг ягона йўли “Бирлик” Партияси ва унинг жарчиси бўлган “Ҳаракат” агентлиги тарафидан йиллардан бери айтиб келинмоқда. Бу йўл – Ислом динида фундаментал ислоҳотлар ўтказиш ва Ислом дини дунёвийлик/секуляризм принципини қабул қилишига, Қуръоннинг 8 асрда қилинган хато тафиридан келиб чиқувчи хато тушунчалар бекор қилинишига эришишдир.

* * * * *

Жаноб Помпеонинг 11 декабрь куни эълон қилинган “Диний Эркинликлар бўйича Билдириш” деб номланган баёнотига ҳам юқоридаги таҳлилни беришдан ташқари, қуйидагиларни қўшмоқчимиз.

Ўзбекистонни дин масаласида “жиддий хавотирга сабаб бўлаётган давлатлар рўйхатидан” чиқарилиши хато бўлган. Чунки, Ўзбекистонда ҳозир ҳам диний эркинликлар жуда чекланган, мусулмонларга тўла диний эркинлик берилмаган, уларга Шариат қонунлари билан яшашга ҳам рухсат йўқ. Энг қизиғи, Ғарб давлатларида ҳам аҳвол айнан шундай. Демак, дин масаласида “жиддий хавотирга сабаб бўлаётган давлатлар рўйхатига” АҚШ ва ҳамма Ғарб мамлакатлари киритилиши керакмасми? Ҳа, киритилиши керак. Бу – боши берк кўчага кириш-ку!

Бу боши берк кўчадан чиқишнинг ягона йўлини ҳам “Бирлик” Партияси ва унинг жарчиси бўлган “Ҳаракат” Агентлиги кўрсатиб бўлди. Уни яна бир марта такрорлаймиз – Ислом динида фундаментал ислоҳотлар ўтказиш ва Ислом дини дунёвийлик/секуляризм принципини қабул қилишига эришиш шарт. Ана ўшандагина Ислом динига демократик давлатларда ҳам тўла эркинлик берилади. Бундан ҳам муҳими, ислом терроризми ўз-ўзидан йўқ бўлади.
« Олдинги хабар Хабарлар рўйхати Кейинги хабар »