12 December 2018
20:17 - Шевкат Шариф Страсбургда 3 кишини ўлдирган ва 12 кишини ярадор қилган террорист деб гумон қилинмоқда. Ислом динига нима бўлади?

Кеча Европа Иттифоқининг парламенти иш олиб борадиган Франциянинг Страсбург шаҳрида Исо пайғамбарнинг туғилган куни муносабати билан ўтказилаётган ярмаркада қуролли террорист 3 кишини ўлдириб ва турли хабарларга кўра 11 ёки 12 кишини ярадор қилиб, қочиб кетгани ҳозир бутун жаҳон ахборот воситаларининг диққат марказидадир. Ижтимоий тармоқларда бу терактни уюштирган 29 ёши Шевкат Шарифнинг расми ҳам эълон қилинди. Унинг квартирасида тинтув ўтказган полиция қуроллар топибди.

Расмиданоқ мусулмонлиги кўриниб турган Шевкат Шарифни полиция шубҳали шахс деб ҳисоблар экан, у радикал исломий гуруҳлардан бирида бўлгани ҳам энди тахмин қилинмоқда.

Страсбургдаги ярмарка Европадаги энг катта ярмаркалардан бири эканлиги, Франция Президенти Эммануэл Макрон ҳалок бўлганларнинг оилаларига таъзия изҳор қилгани, 2015 йилдан бери Франциядаги терактлардан 24 киши ҳалок бўлгани ҳам хабарларда айтилган.

Агарда Страсбургдаги қонли воқеа исломий теракт бўлиб чиқса, Ислом динининг дунёдаги обрўси яна тушади, Ғарбда мусулмон муҳожирларга салбий муносабат янада кучаяди. Бу кетишда Ислом дини ўлади. Уни ўлимдан сақлаб қолиш ҳамда Ислом дунёсини ҳозирги қолоқлик ва қашшоқликдан қутқаришнинг ягона йўли – “Бирлик” Партиясининг жарчиси бўлган “Ҳаракат” Агентлиги йиллардан бери такролаб келаётгандек, Ислом динида фундаментал ислоҳотлар ўтказиш ва Ислом дини дунёвийлик/секуляризм принципини тан олишига эришишдир.

Эслатиб ўтиш керакки, 2017 йил 10-11 сентябрь кунлари Остонада бўлиб ўтган Ислом Ҳамкорлик Ташкилотининг саммити қабул қилган Декларациянинг бир жумлалик 7-чи моддаси бизнинг фикримиздан иборат: "Ислом жамиятини қолоқлик ва қашшоқликдан, ақли-идрокий қашшоқлик ҳам шунинг ичида, қутқариш керак". Яъни Ислом давлатларининг раҳбарлари бизнинг фикрни қабул қилдилар, аммо ҳозирги аҳволдан чиқиш устида ишламаяптилар. Уларни бунга мусулмонларнинг ўзи мажбур қилиши керак.