18 November 2017
11:41 - Эл оғзига элак тутиб бўлмайди: Шавкат Мирзиё билан Нью-Йоркда учрашган пасткаш ўзбекларни Садиқ Сафоев қандай танлади?

“Ҳаракат” Агентлиги шу йил 21 сентябрда Ўзбекистон Президенти Шавкат Мирзиё Нью-Йоркда қандайдир ватандошлари билан кўришганини ЎзАга асосланиб бир эмас, икки марта хабар қилар экан, бундай муҳим учрашувнинг биронта тафсилоти очиқланмагани, учрашув қатнашчилари кимлиги ҳам айтилмагани – бу учрашув масхарабозликдан бошқа нарса эмаслигининг кўрсатгичидир, деб баҳолаган эдик.

Тўғри, ЎзАнинг хабарида Шавкат Мирзиё ўзи билан учрашган ватандошларга Ўзбекистонда олиб борилаётган оламшумил ишлар ҳақида гапиргани ва “Мамлакатимиз тараққиётига ҳисса қўшиш истагида бўлган барча чет элдаги юртдошларимизни Ўзбекистонга таклиф этаман, уларни қўллаб-қувватлашга ва ҳар томонлама рағбатлантиришга тайёрман” дегани айтилади. Аммо, булар ҳам умумий гаплар. Нима, ватандошлардан ҳеч ким ҳеч нарса демадими? Уларни Шавкат Мирзиёни тамоша қилиш учунгина учрашувга чақиришганмиди?

Мана орадан сал кам 2 ой вақт ўтди. Шавкат Мирзиёнинг таклифига қулоқ солиб, биронта учрашувда қатнашган ўзбек АҚШдан Ўзбекистонга қайтдими? Учрашувда қатнашмаган бўлса ҳам, ЎзАнинг хабаридан таклифни эшитган биронта чет элда яшаётган ўзбек Ўзбекистонга қайтдими?

Бундай саволлар кўп, аммо Шавкат Мирзиё ҳам, унинг тақимидагилар ҳам, жим. Буни ҳам тушуниш мумкин, учрашув масхарабозлик бўлгандан кейин, ундан қанақа натижа кутиш мумкин.

Аммо, ўзбегимнинг “Эл оғзига элак тутиб бўлмайди” деган мақоли бор. Ўша учрашувда қатнашган 15-20 киши ҳам шу элнинг бир қисми, уларнинг ҳам оғзи бор, уларнинг оғзига элак тутиб бўлармиди?

Ҳозир ўша оғизлардан чиққан гаплар ҳаммага тарқалиб бўлди. Маълумки, Ўзбекистондаги қўғирчоқ ахборот воситалари Шавкат Мирзиё сентябрь ойида расмий ташриф билан АҚШга бориши ҳақида май ойидаёқ хабар тарқатган эдилар. Тезда маълум бўлдики, ҳеч қандай расмий ташриф йўқ, Шавкат Мирзиё ҳамма давлатларнинг раҳбарлари каби БМТнинг йиллик Бош Ассмблеясида иштирок этиш учунгина Нью-Йоркга кетмоқда.

Шавкат Мирзиёнинг АҚШда яшаётган ўзбеклар билан учрашувига тайёргарчилик ўша пайтдаёқ бошланибди. Ўзбекистон Миллий Хавфсизлик Хизмати Ўзбекистоннинг Вашингтондаги элчихонаси билан биргаликда ҳар доим ўзлари билан алоқада бўлиб юрган ишончли ўзбеклардан учрашувга одам танлашга бошлашган. Жуда кўп ўзбеклар бир неча марта элчихонага чақирилган, улар билан суҳбатлар ўтказилган.

Шавкат Мирзиё билан учрашувга тайёргарлик бўлаётганини эшитиб қолганлардан баъзилари учрашувда қатнашиш учун элчихонага мурожаат ҳам қилганлар. Уларнинг ҳаммасига рад жавоби берилган, уларнинг ичида Афғонистонда келган ўзбекларнинг “Туркистон” жамияти аъзолари ва бухоро яҳудийлари ҳам бор.

Шу ойлар ичида Ўзбекистоннинг бир вақтлар АҚШдаги элчиси бўлган, ҳозир Олий Мажлис Сенати раисининг биринчи ўрибосари вазифасида ишлаётган Содиқ Сафо ИККИ марта АҚШга келиб, Шавкат Мирзиё билан учрашувга танланаётганлар билан суҳбатлар ўтказган, ҳаммага президент билан учрашув пайтида оғиз очмаслик, ҳеч қандай савол бермаслик, фақатгина унинг гапларини эшитиш ва бирон нарса сўраса қисқа жавоб бериш таълимотини берган.

Хуллас, шундай чиғириқлардан ўтказилган аҳмоқ ва пасткашлар 21 сентябрда Шавкат Мирзиё билан учрашганлар, унинг лофларини тинглаганлар ва тарқалганлар.

Биз учрашувда қатнашган ўзбекларни аҳмоқ ва пасткашлар дейишимиз ҳеч қандай ҳақорат эмас, ҳақиқитни гапиришдир. Чунки улар Ўзбекистон дунёнинг энг мудҳиш диктаторликлардан бири эканини, ҳатто мамлакатдан чиқиш визаси олиш катта муаммо эканлигини, АҚШда демократия борлиги учун фаровон ҳаёт мавжудлигини, шу сабабли бу ерда ўртача ойлик Ўзбекистондан камида 30 баравар юксаклигини билишади. Аммо, уларнинг на миллат ва на давлат билан ишлари бўлмагани сабабли, Шавкат Мирзиёнинг олдига Ўзбекистонни бу ғариб аҳволдан олиб чиқиш учун нималар қилиш кераклиги ҳақида талаблар қўймаганлар.

Уларнинг биронтаси Ўзбекистонга қайтишни ўйламаётгани ҳам ўз-ўзидан маълум. Аммо, масхарабозлик учрашувида қатнашганлари пасткашлик белгисидир.

Расмда – Шавкат Мирзиёнинг Нью-Йоркда номаълум ватандошлар билан учрашуви. Бу расм ўзбекнинг тарихига навбатдаги масхарабозликнинг кўрсатгичи сифатида кириши аниқ.