Кеча АҚШ Конгрессининг 100 кишилик Сенати 89 қарши 8 овоз билан 1 октябрда бошланадиган молиявий йилда ҳарбий ҳаражатлар учун 700 млрд доллар ажратиш ҳақида қарор қабул қилди. Бу - ҳозирги йилдагидан 68 миллиардга кўпроқдир.

700 миллиарднинг 640 миллиарди янги қуроллар сотиб олиш ва қўшинларга ойлик тўлаш каби умумий ҳаражатлардан иборат бўлса, қолган 60 миллиарди – Афғонистон, Ироқ, Сурия ва бошқа жойлардаги конфликт зоналарида олиб бориладиган операциялар учун сарфланади.

Ўзбекистондек давлатнинг йиллик бюджети бор-йўғи $11 миллиард атрофида эканлигини ҳисобга олсак, АҚШнинг ҳарбий бюджети қанчалик катта эканлигини яхшироқ тушуниш мумкин.

Reuters Агентлиги Сенатнинг бундай қарори Доналд Траманинг ҳозиргидан ҳам катта ва кучли армияга эга бўлиш талаби билан қабул қилинди, дейиш билан бир қаторда, Трампга нисбатан салбий муносабатини яна бир марта урғулаш учун бўлса керак, “аммо бу қарор йилнинг охирида ҳукуматнинг ҳаражатлари даражаси учун курашни оловлантиради”, деб қўшиб қўйган. Яъни, ҳарбий ҳаражатларнинг орттирилиши, бошқа ҳаражатларнинг зарарига бўлиши мумкинлигига имо-ишора қилган.

Associated Press Агентлиги бундай қарор Сенатда кўпчлик овозга эга бўлган респбликачиларнинг, авваламбор, Сенатнинг Қуролли кучлар комитетининг раиси, машҳур Жон МакКейннинг саъй-ҳаракатлари билан маъқулланганини урғулайди. Аслида, бу фикр унчали тўғри эмас. Чунки, бу қарор мутлақо кўпчиликнинг, демак, демократларнинг ҳам истаги билан қабул қилинди.

Доналд Трампнинг сайлов олди кампанияси давридаёқ кўтарилган “Американи қайтадан буюк қилиш” шиорини амалга ошириш нуқтаи назаридан ҳарбий ҳаражатлар учун катта пул ажратилаётгани мутлақо тўғри, аммо бунинг ўзи етрасиз. Ҳозир, яъни 21 асрда сиёсат ҳарбий кучдан қолишмайдиган даражада эффектив қуролга айланмоқда. Аммо, АҚШ айнан сиёсат соҳасида самарали иш қилаётгани йўқ.

Бу қарор Конгресснинг қуйи палатаси – Вакиллар Уйи – тарафидан июль ойида тасдиқланган экан. У кучга кириши учун энди уни президент имзолаши керак. Бу қарор Доналд Трампнинг талаби билан қабул қилинган эканми, демак, сўзсиз имзоланади.