17 September 2017
19:06 - Шавкат Мирзиё АҚШга бориш йўлида Нурсултон Назарбойни аэропортда кузатиб қўйди ва унинг кетидан Ашхободга келди

Ўзбекистон Президенти Шавкат Мирзиё БМТ Бош Ассамблеясининг Нью-Йоркдаги йиллик мажлисида қатнашиш учун АҚШга бориши анча аввал эълон қилинган эди. У бугун АҚШга жўнаб кетди ва йўл-йўлакай кутилмаган ишлар ҳам қилди.

Шавкат Мирзиё кеча Тошкентга давлат ташрифи билан келган ва бугун Ашхободга жўнаб кетган Қозоғистон Президенти Нурсултон Назарбойни Тошкент аэропортида шахсан ўзи кутиб олгани ва шахсан ўзи кузатиб қўйгани –кутилмаган ишдир. Қозоқ хабар воситалари Шавкат Мирзиёнинг бу ишини “жамоатчилик учун кутилмаган ва Нурсултон Назарбойга камдан-кам бўладиган ҳурмат кўрсатиш” деб баҳоладилар. Ростдан ҳам бу камдан-кам бўладиган воқеа, аммо тушуниш керакки, Шавкат Мирзиёнинг ўзи АҚШга Ашхабод орқали кетиш учун аэропортга келган эди.

Тўғри, икки президент Ашхабодга ўз учоқларида учиб кетдилар. Аммо, уларнинг Ашхободга боришдан мақсадлари – Туркманбоши-2 билан учрашишдан ташқари, Ёпиқ иншоотларда ва жанг санъатлари бўйича V Осиё ўйинларининг очилиш маросимида иштирок этиш экан.

Шавкат Мирзиё бугуноқ ёки эртага АҚШга учиб кетади, Нурсултон Назарбой ва Туркманбоши-2 ҳам Нью-Йоркка бориш-бормасликлари хабарларда айтилмайди.