23 June 2017
01:16 - Ўзбекистон ва Қозоғистон чегара пунктларида янги ўтказгичлар ташкил этилади
Қозоғистон Сенатининг 22 июнь кунги ялпи мажлисида Қозоғистон ва Ўзбекистон ҳукуматлари ўртасида тузилган чегара ўтказиш пунктларига оид келишув ратификация қилинди. Бу ҳақда қозоқ матбуоти хабар қилмоқда. Маълум бўлишича, мазкур протокол президент томонидан имзолангач¸ кучга киради. Тушуниш мумкинки, бундай протокол Ўзбекистон тарафидан имзоланиб бўлган.

Келишувга кўра¸ Ўзбекистон-Қозоғистон чегарасидан 80 км. масофада жойлашган “Бейнеу” темир йўл ўтказиш пункти чегарадан икки километр масофада жойлашган “Оазис” станциясига кўчирилади. Бундан ташқари ўзаро келишувда¸ икки қўшни давлат ўртасида автомобиллар ўтказиш учун “Целинный” ва “Сирдарë” пунктлари очиш¸ ҳозирда ишлаб турган “Қазиқурт”¸ “Қоплонбек” ва “Отамакон” автомобиль ўтказиш пунктлари мақомини икки томонламадан¸ кўп томонламага айлантириш ва халқаро даражага кўтариш ҳам кўзда тутилган.

Қозоғистондан транзит пунктлари орқали енгил машиналарда Россияга ўтувчи ўзбекистонликлар текширувини соддалаштириш ва чегара муҳрини улар паспорти эмас¸ миграция картасига қўйиш ҳам ўзаро келишувдан ўрин олган.
« Олдинги хабар Хабарлар рўйхати Кейинги хабар »