Кеча кечқурун расмий ташриф билан Остонага етиб келган Ўзбекистон Президенти дарҳол қозоғистонлик ҳамкасби билан учрашувлар бошлайди деб кутилган эди. Аммо, ундай бўлмади. Тахмин қилиш мумкинки, Ўзбекистонда вилоятларга чиқавериб чарчаган Шавкат Мирзиё расмий ташриф баҳонасида Остонада дам олволган.

Бугун эрталаб Шавкат Мирзиёни Нурсултон Назарбой қабул қилди. Бу ҳақдаги Қозоғистонда тарқатилган ўта қисқа хабарларга учрашув бошланиши олдидан икки президентнинг журналистлар олдида гапирган гапларини кўрсатувчи видео қўйилган. Видеодан кўринишича, Нурсултон Назарбой аввал қозоқ ва кейин рус тилларида Ислом Каримнинг икки давлат ўртасидаги алоқаларни ривожлантириш учун қилган буюк хизматларини тилга олди ва ҳозир алоқлар аввалгисидан ҳам яхшиланиб бораётганини урғулади.

Хабарларда Ислом Каримнинг ўлимидан кейин қисқа вақти ичида икки давлат ўртасидаги савдо айланмаси 30 фоизга (!!!!!!) ошгани айтилаётганидан тушуниш мумкинки, аслида Ислом Карим икки тарафлама алоқаларни ривожлантириш йўлида асосий тўсиқ бўлган, демак, Нурсултон Назарбойнинг Ислом Карим ҳақидаги сўзлари ёлғондан бошқа нарса эмас.

Фақат рус тилида гапирган Шавкат Мирзиё ҳам аввалига Ислом Каримни мақтади, Нурсултон Назарбой Самарқандда унинг мазорига борганини ва у ерда айтган гапларини эсалади, Ислом Карим яратган фундаментлар асосида Ўзбекистон-Қозоғистон алоқалари яна ҳам яхшиланишини урғулади. У Нурсултон Назарбойнинг халқаро саҳнада буюк ишлар қилаётганини айтиш билан бир қаторда, нима учундир Ўзбекистондан ҳам кўпроқ Афғонистондаги муаммолар ҳақида гапирди. Ўзи билан бирга 200 дан ортиқ ўзбекистонлик бизнессмен келганини, улар катта ишлар бошлашларини ҳам тилга олди.

Икки президент якккама-якка кўришганда нималарни гаплашганлари эса мутлақо номаълум. Аммо, учрашувдан кейин икки президент журналистлар олдига чиқишган шекилли, қозоқ ахборот воситалари фақатгина Нурсултон Назарбойнинг расмини келтириб, унинг учрашув жуда фойдали бўлгани, Ўзбекистон ва Қозоғистон ўртасида ҳал қилинмаган ҳеч қандай муаммо йўқлиги ҳақидаги гапларини келтирмоқдалар.

Бошқа хабарлардан маълум бўлишича, икки тарафдан 500 бизнессмен қатнашаётган Остонадаги форумда ҳаммаси бўлиб 1 млрд долларлик (айтишга уялса ҳам бўладиган кичкина рақам – “Ҳаракат”) 75 та шартнома имзолангани айтилмоқда. Ўзбекистонда бели бақувват битта ҳам хусусий бизнессмен йўқлигини ҳисобга олсак, аҳвол ачинарли даражада қолавериши шубҳасиздир.

Шавкат Мирзиё билан Остонага келган Ўзбекистон Сенати раисининг ўринбосари Содиқ Сафо қозоғистонлик ҳамкасби Касим-Жомарт Токаев билан учршиб, сенатларнинг ҳамкорлиги ҳақида келишишгани ҳам қозоқларнинг хабарларида айтилмоқда. Иккала сенат ҳам қўғирчоқ эканлигини ҳисобга олсак, уларнинг ҳамкорлиги ўта қизиқ қўғирчоқ театри бўлишини тасаввур қилиш қийин эмас.

Икки давлат ўртасида яна 2 та ўтиш пункти очиш ҳақида келишилгани, бор пунктларнинг 3 таси кеча-кундуз ишлайдиган бўлгани, икки мамлакат биргаликда автомобилар йиғишни бошлаши, қозоқлар ўзбекларга Россия ва Хитой бозорларини биргаликда тўлатишни таклиф қилишгани каби гаплар ҳам қозоқлар тарафидан хабар қилинмоқда.

Шавкат Мирзёнинг Қозоғистонга сафари битган битмагани ёки қачон битиши хабарларда айтилмайди. Ҳар ҳолда икки лидер биронта умумий ҳужжат имзоласлар керак. Ҳозирча эса, хабаримизнинг сарлавҳасидаги саволга жавоб йўқ.