17 January 2017
03:11 - Истанбулда тунги клубда 39 кишини ўлдирган ўзбек террорист Абдуқодир Машарипов қўлга олинди
Туркия оммавий ахборот воситаларида ҳозиргина тарқатилган қисқа хабарда айтилишича, маҳаллий вақт билан ярим кечада янги йил кечаси Истанбулдаги тунги кўнгилочар клубда 39 кишини автомат билан тараб ўлдирган, бир ҳафтадан кейин ўзбек эканлиги аниқланган Абдуқодир Машарипов қўлга олинди. Уни Истанбулнинг Эсенюрт туманидаги адреси ҳали айтилмаётган исломчиларнинг ҳужрасида 5 киши билан бирга қўлга олишибди. Улардан бири Машариповнинг ўғли, иккинчиси исми айтилмаган қирғиз ёки қирғизистонлик, 3 нафари эса аёллар экан.

Расмдан кўриниб турибдики, Абдуқодир Машарипов қўлга олиниш пайтида қаршилик кўрсатган ва бироз калтакланган. Ўша вақтнинг ўзида яна бир нечта ҳужрада махсус оперциялар ўтказилибди.

Истанбул губернатори ва шаҳар хавфсизлик бўлимининг раҳбари эрталаб бу хусусда махсус баёнот беришлари ҳам хабарларда айтилган.