Кеча Россияда парламентнинг қуйи палатаси бўлган Давлат Думасига сайловлар бўлиб ўтди. Марказий Сайлов Комиссияси 2 соатча аввал тарқатган хабарга кўра, сайлов иштирокчиларининг ярмини овози санаб бўлинган. Биринчи ўринда расмий раиси Бош вазир Дмитрий Медведев бўлса ҳам, асл хўжайини Владимир Путин бўлган “Бирлашган Россия Партияси” турибди. Бу партияга овози саналган сайловчиларнинг 53,58 фоизи овоз берибди. Иккинчи ўринда 13,9 фоиз овоз олган Россия Федерацияси Коммунистик Партияси, учинчи ўринда 13,89 фоиз овоз олган Россия Либерал Демократик Партиzси, тўртинчи ўринда 6,13 фоиз овоз олган Адолатли Россия Партияси.

Маълумки, 5 фоиздан кўп овоз олганларгина Давлат Думасига киритилади. Шундай экан, 1 фоиз атрофида овоз олган кичкина партиячаларни эслаб ўтиришга ҳам ҳожат йўқ. Аммо, эътиборга лойиқ нарса шуки, Россия демократларининг колалицияси 1 фоиздан ҳам кам овоз олибди.

Тахмин қилиш мумкинки, сайловларнинг узул-кесил натижаларида юқорида келтирилган рақамлар унчалик ўзгармайди.

Бу ерда дарҳол демократларни танқид қилишнинг кераги йўқ, дейди мухбиримиз. Телеканаллар бутунлай Путин режимининг қўлида бўлган ерда халқ тоталитар пропаганданинг қулидир. Бунинг устига, ҳали империялик руҳидан тўла қутилолмаган русларнинг кўпчилиги Путин Қримни босиб олганидан севиниб, эс-ҳушларини йўқотиб қўйганлар. Ҳозирги босқичда, Россиядаги сайловларда бошқача натижа кутишнинг ўзи ножиддийлик бўларди.

Аммо, дейди мухбиримиз, бироз узоқни кўрабилиш муҳим. Путин собиқ СССРнинг кучга асосланган сиёсатини давом эттириб стратегик хато қилмоқда. Ғарбнинг санкциялари остида Россиянинг иқтисоди ботишни давом эттиради, бунинг натижасида Россия худди СССР каби парчаланиб кетади.

Дарвоқе, Марказий Сайлов Комиссияси билдиришича, кечаги сайловларда бутун Россиядаги сайловчиларнинг 40 фоизи иштирок этган бўлса, Москва ва Санкт-Петербургда 20 фоиздан кам сайловчи сайловда қатнашган. Бу рақамлар Путин режими учун жиддий сигналдир.