26 August 2016
10:08 - Собиқ Франция Президенти Саркози: Яна президент бўлсам, мамлакат бўйича мусулмонларнинг буркинисини тақиқлайман

Франция ва Европанинг бошқа мамлакатларида исломий терактлар даҳшатли даражага чиқар экан, мусулмонларга нисбатан салбий муносабат юқори критик нуқтага яқинлашмоқда. Критик нуқтата етиб борилса, антиисломий терактлар ўртага чиқиши, охир-оқибат фанатик руҳдаги мусулмонлар бутунлай Европадан, ҳатто бутунлай Ғарбдан ҳайдалиши мумкин.

Икки кун аввал Франциянинг Ўртаер денгизи бўйидаги Ницце шаҳрида полиция ходимлари буркини, яъни инсон баданининг юз, кафт ва оёқнинг тўпиғидан пастидан ташқари ҳамма қисмини ўраб турадиган кийимда чўмилаётган мусулмон аёлни мажбуран буркинисини ечтиргани ҳақида хабар тарқалган эди. Кеча Лондонда бир гуруҳ мусулмон аёл Франция элчихонаси олдида бунга қарши норозилик намойиши ўтказди.

Демократик давлатларда ҳаммага намойиш ўтказиш ҳаққи берилган. Аммо, нимага Лондондаги мусулмон аёллар шу йил 15 июлда айнан ўша Ницце шаҳрида бир мусулмон йигит юк автомобили билан 84 кишини, уларнинг ичида 10 ёш бола ҳам бор, ваҳшийларча босиб ўлдиришига қарши норозилик намойиши қилмадилар, деган савоб туғилиши табиий. Аммо, мусулмонлар ҳали бунақа саволларни тушуниш даражасига етиб келганлари йўқ.

Ниццеда мусулмон аёлнинг буркинисини ечтириш воқеасига Франциянинг ўзида муносабат билдираётганлар ҳам бор. Улардан бири – Франциянинг собиқ Президенти Николя Саркозидир. Reuters Агентлигининг хабарига кўра, Николя Саркози шундай дебди: “Мен Франция пляжлари ва ҳовузларига буркини кийимидагиларнинг тиқилишига йўл бермайман. Уни бутун мамлакат бўйлаб тақиқлайдиган қонун лозим.”

Бу мамлакатда ўтказилган сўровнома натижаларига кўра, аҳолининг 79 фоизи Саркози қайтадан президент бўлишини истамас экан. Бу муҳим эмас, дейди мухбиримиз. Саркозининг гаплари ҳеч шубҳасиз французларга ёқади. Демак, у гап ерда қолмайди. Воқеалар шу йўналишда ривожланаверса, буркинини қўйиб туринг, ҳижоб ва бошқа мусулмонча кийимлар ҳам тақиқланади.

Эслатиб ўтиш керакки, Франциянинг Канн, Ницце ва яна бир қатор минтақаларида буркини тақиқланган. Демак, Ницце полицияси мусулмон аёлнинг буркинисини қонун доирасида ечтирган.

Яна эслатиб ўтиш керакки, буркини асли араб, аммо ҳозир Австралияда яшайдиган Аҳад Занетти тарафидан дизайн қилинган.