29 July 2016
08:23 - Туркиянинг Олий Ҳарбий Шўросида 99 полковник генераликка кўтарилди, мамлакат бўйлаб катта ўзгаришлар бўлмоқда
15-16 июлдаги исёндан кейин киритилган Фавқулодда Ҳолат доирасида Туркиядаги 358 генарал ва адмиралдан 149 нафари армиядан отилгани ҳақида кеча эрталаб хабар тарқатилган эди. Кеча тушдан кейин Президент Ражаб Эрдўғон раислигида йиғилган Олий Ҳарбий Шўросида 99 полковник (туркчаси – албай) генералликнинг биринчи поғанаси бўлган туғгенерал (бригада генерали) унвонига кўтарилибди. 47 генерал ва адмирал нафақага жўнатилган, 16 генерал ва адмиралга бир поғана юксак унвонлар берилган. Масалан, 4 туғгенералга берилган бир поғона юксак унвоннинг туркча номи тумгенерал (генерал-майор).

Айни замонда, армия ва давлатнинг иш ерларини фатхулла-гуленчликда гумон қилинаётган одамлардан тозалаш давом этомоқда. Мана баъзи мисоллар. 213 ҳарбий учувчи армиядан, 768 киши (!!!) Истанбул шаҳар ҳокимлигидан ҳайдалган. Қандайдир Синжан қамоқхонасининг 50 нафар ходими ҳибсга олинган. Ҳар куни юзлаб, минглаб одамлар ишдан ҳайдалмоқда, уларнинг бир қисми дарҳол ҳибсга олинмоқда.

Аввал хабар қилинганидек, Туркияда 3 университет, юзлаб хусусий мактаблар, 45 газета, 16 телеканал, 16 журнал, 3 хабар агентлиги ва 24 радио бекитилди.

Бундан ташқари, аввал мустақил бўлган Жандарма қуролли кучлари Ички ишлар вазирлигига киритилди. Вақти келгани учун айтиш керакки, яқинда Россияда бунинг тескариси қилиниб, Ички ишлар вазирлиги таркибидаги қуролли кучлар вазирликдан чиқарилган ва мустақил Миллий гвардияга айлантирилган эди.

Президент Ражаб Эрдўғон Туркия Қуролли Кучлари Бош Штаби ва Миллий Истиҳборат Ташкилоти (Ўзбекистоннинг ҳозирги номи Миллий Хавфсизлик Хизмати бўлган собиқ КГБсига ўхшаш ташкилот) тўғридан-тўғри ўзига бўйсуниши кераклигини таклиф қилди. У таклиф қилдими, демак, қилинса керак. Аммо, бунинг учун Конституцияга ўзгартиришлар киритилиши лозим.

Эслатиб ўтиш керакки, Туркия парламентар республика бўлиб, президент парламент чиқарган қонунларни имзолаш ва шу каби рамзий вазифаларни бажаради. холос. Аммо, Эрдўғон президент бўлиб сайлангандан бери Конституцияни оёқ ости қилиб, бутун ҳокимиятни ўз қолига олиб бўлган, у ҳозир Туркияда якка ҳоким.

Аслида, демократик президентлик системаси ёмон эмас, Эрдўғоннинг Конститцияни ўзгартириб, Туркияни расман президентлик республикасига айлантириш мақсади ҳам тушунарли. Аммо, у бир неча ой аввал қандайдир чиқишида президентлик республикасининг самарали эканлиги ҳақида гапириб, шундай системага эга бўлган давлатлардан бир нечтасини санар экан, Гитлер Германиясини ҳам айтвориб, кулгига қолгани қизиқ.

Дарвоқе, давлат тўнтаришига уринишнинг бош раҳбари шубҳасиз Фатхулла Гулен эканлиги иддао қилинаётган бўлса ҳам, амалий ишларни ким бошқаргани ҳақида турли гап-сўзлар бор. Аввалига, бундай одам Ҳаво Кучлари Қўмондони Акин Ўзтурк эканлиги айтилди, у ҳибсга олинган. Аммо, ҳозир ҳамма ишни ҳарбий бўлмаган одам бошқаргани, бундан ҳам қизиғи, қандайдир казинода ўтириб бошқаргани айтилмоқда.

Хулаас, шунақа гаплар. Нима ҳам дердик, шунақа Туркия.
« Олдинги хабар Хабарлар рўйхати Кейинги хабар »