Франциянинг Ла-Манш канлига чиқадиган Юқори Нормандия вилоятидаги Сент-Этьен-дю-Рувре шаҳарчасида кеча пичоқлар билан қуролланган иккита террорист черковга ҳужум қилиб, “Оллоҳи Акбар” ҳайқиришлари остида черковнинг 84 ёшли рухонийсининг бўғозини кесиб ўлдирганлар. Яна 2 киши ярадор бўлган. Бу ҳужум учун маъсулиятни ИШИД бўйнига олган.

Дарҳол бу ерга етиб келган Франция Президенти Франсуа Олланд воқеани теракт деб баҳолади ва ислом терроризмига қарши кураш узоқ давом этишини, аммо Франция ғалаба қозонишини урғулади.

Ницца шаҳрида исломчи террорист 12 июль куни бир неча дақиқада 80 кишини ўлдириб, 200 дан кўпини яралашга улгурганини ҳисобга олсак, Сент-Этьен-дю-Рувредаги ҳужум хабарга ҳам арзимайдиган воқеадир. Аммо, бу воқеанинг иккита нуқтаси диққатга сазовор, дейди мухбиримиз.

Биринчидан, террористлардан бири ИШИДга қўшилиш учун 2015 йили Сурияга кетаётган пайтда Туркияда қўлга олиниб, Францияга қайтариб берилган экан. Францияда уни 2 йилга қамашибди ва бир йилдан кейин қўлига электрон браслет кийгизиб, чиқариб юборишибди. Унинг фақат эрталаб соат 8:30 дан 12:30 гача уйидан чиқишга ҳаққи бор экан. Кўринишидан, у Франциянинг қонунларини ҳурмат қиладиган одам бўлган ва айна шу соатлар ичида ҳамкасби билан черковга ҳужум қилган.

Иккинчидан, Франсуа Олланднинг ислом терроризми устидан ғалаба қозониш ҳақидаги сўзлари эртакдан бошқа нарса эмас. Ислом тероризмининг илдизлари Ислом динининг Қуръонни хато тафсиридан келиб чиққан тушунчаларидан экан, ислом терроризмини, Франсуа Олланд ўйлаётгандек, куч билан енгиб бўлмайди. Ислом терроризмини тўхтатишнинг ягона йўли – Ислом динида фундаментал ислоҳотлар ўтказиб, диннинг хато тушунчалардан тозалаш ва, аввламбор, Ислом дини дунёвийлик/секуляризм принципини қабул қилишига эришишдир.