Тошкент вақти - 
24 July 2016
22:37 -
Истанбулда “Жумҳурият ва Демократия митинги” кутилгандан ҳам ҳашаматли бўлди, бу Эрдўғонга огоҳлантириш сигналидир
Улуғ Отатурк раҳбарлигида қурилган Жумҳурият Халқ Партияси бугун Истанбулнинг марказидаги Тақсим майдонида “Жумҳурият ва Демократия митинги” ўтказиш ниятида эканлигини аввалги хабарларимизда тилга олган эдик.Бугун бу митинг биз кутгандан ҳам ҳашаматлироқ шаклда ўтказилди. Ташкилотчиларнинг ўзи ҳам митингга келганларниннг сонини баҳолашга ҳаракат қилмадилар. Аммо, митинг қандай бўлгани расмдан ҳам кўриниб турибди.
Митингда фақатгтга битта одам сўзга чиқди - Жумҳурият Халқ Партияси лидери Кемал Қиличдорўғли. У 15-чидан 16-чи июлга ўтар кечаси бўлган давлат тўнтаришига уринишини қоралади, ўша куни мардлик кўрсатган халқни олқишлади ва 10 моддадан иборат Тақсим Манифестини ўқиб эшиттирди. Бу баёнот каби ҳужжатда ҳам давлат тўнтариши қораланади, ғолиб чиққан халқ олқишланади. У ерда диққатга сазовор бўлган бошқа 2 нуқта бор.
Биринчиси. Президент Эрдўғон исми тилга олинмаса ҳам, айнан шу одамнинг ташаббуси билан “Балёз” ва “Эргенекон” номи билан тарихга кирган суд жараёнлари натижасида дунёвий давлатчилик тарафдори бўлган ҳарбийлар ва турк миллиётчиларининг қаматилиши ҳаммага дарс бўлиши кераклиги Манифестда алоҳида урғуланган. Яъни, очиқча айтсак, Эрдўғонга огоҳлантириш сигнали юборилган.
Иккинчиси. Давлатни бошқаларга нафрат ва ғазаб асосида бошқариб бўлмайди, исёнчилар ҳуқуқий йўллар билан жазоланиши керак, аммо бу масалада ҳаддан ошиш давлатнинг ўша исёнчилардан фарқи йўқлигини кўрсатиб қўяди, дейилади Манифестнинг охирги моддасида. Яъни, бу ерда Эрдўғонга иккинчи муҳим огоҳлантириш жўнатилганини кўриш мумкин.
Нима бўлганда ҳам, дейди мухбиримиз, онамухолифат партияси ташкил қилган бундай буюк митингининг ўзи Эрдўғон ва унинг ҳукуматига қуйидаги катта сигналдир: Исённинг бостирилишидан фойдаланиб, Туркияни ўша фатхулла-гуленчилар ҳам истаган исломий давлатга айлантириш йўлидан орқага қайт!
Билмайдиганлар учун эслатамиз, “Балёз” ва “Эргенекон” операцияси давомида қамалганлар, кейинчалик, гўёки бу операциялар фатхулла-гуленчилар томонидан амалга оширилган экан баҳонаси билан озод қилинган эди. Аслида, бу операцияларнинг бошида Эрдўғон турган.
Бу операциялар ҳақида маълумот олишни истаганлар “Ҳаракат” сайтининг қидирув системасига кириб, Балёз ва Эргенекон сўзлари орқали тегишли хабарларни топишлари мумкин.
