14 July 2016
10:32 - Қизиқ: Германия канцлери Ангела Маркел Қирғизистонга келди, унинг бу ерда нима иши бор?
Қирғиз ахборот воситалари Германия канцлери Ангела Маркел кеча кечқурун расмий ташриф билан Қирғизистонга келгани, уни аэропортда Президент Алмазбек Атамбаев шахсан кутиб олганини билдирдилар. Бугун бу икки лидернинг ёпиқ эшиклар орқасидаги музокаралари бошланди ва ҳозир давом этмоқда. Сўнгра, улар биргаликда матбуот конференцияси ўтказишади.

Германиянинг Қирғизистон билан жиддий алоқалари борлигига ҳеч ким ишонмайди. Шундай экан, Буюкбританиянинг ЕИдан чиқиши, Туркия билан муҳожирлар масаласи бўйича тушунмовчиликлар, Россия билан эса совуқ уруш авжига чиқаётгани сабабли Ангела Маркелнинг боши шундоқ ҳам дардда экан, унинг Қирғизистонга келишидан мақсад нима? Ўз-ўзидан маълумки, демократ Ангела Маркелнинг қирғизлар ўзбекларга нисбатан фашистик сиёсат олиб бораётгани билан иши ҳам бўлмайди.

Тахмин қилиш мумкинки, АҚШ Афғонистондаги ўз қўшинларини 2016 йил охиригача олиб кетиш режасидан воз кечгандан кейин, бу минтақада вазият ўзгарди. Табиий, НАТО ҳам Афғонистонда ўз кучларини кенгайтиришга бошлайди. Демак, Манас ҳарбий базаси ва аэропортидан НАТОнинг фойдаланиши қайтадан кун тартибига чиқаётгани ғоят табиийдир. Маълумки, қирғизлар Москванинг буйруғи билан НАТОни Манасдан чиқариб юборгандилар.

Нима, энди бирон нарсалар ўзгардими? НАТО Путиннинг рухсатини олдими? Маркел Тошкентга ҳам ўтиб, Хонобод аэропортини қайтадан америкаликлар ва НАТОга фойдаланишга бериш ҳақида ҳам гаплашмайдими?

Ҳозирча, воқеаларни кузатиб боришдан бошқа йўл йўқ.
« Олдинги хабар Хабарлар рўйхати Кейинги хабар »