02 July 2016
00:43 - Бечора Путин, Финландияга расмий ташриф билан келиб ҳам, НАТО устидан шикоят қилмоқда

Россия Президенти Владимир Путин кеча Финландияга, балки, биринчи марта расмий ташриф билан келди. Ғарб Россия билан алоқаларини минималлаштириб турган пайтда, НАТО аъзоси бўлмаса ҳам, Европа Иттифоқи аъзоси бўлган Финландия Россия Президентини ўзига таклиф қилгани қизиқ воқеа.

Нима бўлганда ҳам, қўшничилик – қўшничиликдир, шу маънода Финландияни тушуниш мумкин. Аммо Путиннинг Финландияда ҳам Россия билан феълан совуқ уруш олиб бораётган НАТО устидан нолиши кулгилидир. У ҳали НАТОга кирмаган, аммо кириш йўлидан кетаётган финландияликларни ўзича қўрқитиш ёки огоҳлантириш ниятида айтган гаплари устидан кулишини ҳам йиғлашни ҳам билмайсан, киши.

Мана унинг сўзлари: “НАТОнинг инфраструктураси чегараларимизга яқинлашиб келмоқда. Гўёки Эроннинг ракеталарига қарши туриш мақсадида бизнинг атрофимизда Ракеталарга Қарши Мудофаа системаси яратилмоқда. Бир фин дўстим айтганидек, НАТО Россияга қарши жон-дилдан охирги фин аскари йўқ бўлгунча урушга тайёр, сиз шуни истайсизми?”

У яна шуларни ҳам гапирди: “Биз Финландиянинг талаби билан ўз қўшинларимизнинг чегарадан 1,5 минг километ орқа чекинтирдик. Аммо, Финландия НАТога аъзо бўлса ҳам шундай давом этавреади, деб ўйлаяпсизми?”

Ҳеч шубҳам йўқки, Путиннинг бу КГБча ҳазиллари Финландиянинг НАТОга киришини тезлаштиради.

Расмда – Россия ва Финландия президентлари Владимир Путин ва Саули Ниинистё.