30 June 2016
19:39 - Ғарбнинг санкциялари остида ботаётган Россия Туркияга дарҳол қучоқ очмоқда
Ўрис ахборот воситалари ўз президентлари Владимир Путин Туркия Президентининг сўз ўйинлари билан ўтган йили рус ҳарбий учоғининг турклар тарафидан уриб туширилиши бўйича кечирим сўрашга ўхшаган мурожаатини мамнуният билан кечирим сўраш сифатида қабул қилгани ва Туркия билан алоқаларни нормаллаштириш ҳамда Туркияга қарши киритлган санкцияларни бекор қилиш хусусида топшириқ берганини айтмоқдалар. Эрдўғон Путинга хат ёзиш билан чекланмасдан, унга телефон ҳам қилгандан кейин, бу йил сентябрь ойининг бошларида Хитойда бўладиган G20 саммити пайтида икки президент алоҳида учрашув ҳақида келишганлари ҳам айтилмоқда. Бундай келишув борлигини Туркия тарафи ҳам айтмоқда.

Бугун Кремлда Россиянинг чет эллардаги элчилари билан учрашув ўтказган Владимир Путин НАТО Россия атрофидаги кучларини орттираётганидан шикоят қилиб, бунга қарши ҳеч нарса қилмасликларини айтди. Кечагина ҳаммага мушт кўрсатаётган Путиннинг бундай чекиниши - Россиянинг иқтисодий аҳволи ёмонлашаётгани сабабли эканлиги шубҳасиз.

Путиннинг топшириғига кўра, Россия Бош вазири Дмитрий Медведев Туркия билан савдо-иқтисодий алоқаларни қадамма-қадам тиклаш устида иш бошлагани ҳам ҳамма хабарларда айтилмоқда. Икки давлат ўртасида чартер учоқлар учишини тиклаш, Туркияга бориш истагидаги рус туристлари учун йўл очиш ҳам кун тартибида. Бир неча ҳафта ичида Туркиядан Россияга аввалари олиб келинаётган мева ва озиқ овқат маҳсулотлар оқиими ҳам тикланади. Тўғри, Туркиянинг ўрнини эгаллаб олган бошқа мамлакатларининг манфаатлари зарар кўрмаслиги кераклиги ҳам эслатилмоқда.