Тошкент вақти - 
29 June 2016
07:33 -
Дунёнинг диққат марказида Истанбулдаги теракт: У ерда ҳалок бўлганлар сони 36 га чиқди, террористлар ИШИДчи эканлиги гумон қилинмоқда. Абдураҳим Пўлат нима дейди?
Туркия Бош вазири Бинали Йилдиримга асосланиб бутун жаҳон ахборот воситаларида тарқатилаётган хабарларда айтилишича, Отатурк аэропортининг чет эллар терминалига кираверишида 3 террорист аввал Калашников автоматлари билан атрофдагиларни ўққа тутиб, кейин ўзларини портлатишлари натижасида ҳалок бўлганлар сони камида 36 бўлиб, ярадор бўлганларнинг сони 150 дан ошди.Турли хабарларга кўра, террористлар 7 киши эканлиги, ўзини портлатган 3 кишидан ташқари, бу террористик актни тайёрашда иштирок этган 4 киши борлиги тахмин қилинмоқда, уларни ушлаш учун керакли ишлар қилинмоқда.
АҚШнинг CNN телеканали портлашлар юз бергандан бери асосан ўша портлашлар ҳақида эшиттиришлар олиб бормоқда. Ҳамма бу портлашлар кутилмаган воқеа эканлигини айтиб, воқеани ўзича таҳлил қилиш билан овора. Таҳлилларнинг мутлақо кўпчилиги, дейди “Бирлик” Партияси раиси Абдураҳим Пўлат, чиройли гаплардан иборат бўлиб, таҳлил қилаётганлар ислом терроризмининг табиатини тушунмасликлари кўриниб турибди. Бу эшиттиришларни бироз кўргандан кейин, ҳар замонда бир кўриб қўйиш билан чекланмоқдаман.
Ҳа, дарвоқе, Президент Барак Обама ҳамда президентликка номзодлар Даналд Трамп ва Ҳиллари Клинтон Истанбулдаги терактни қоралаганлари катта янгиликдек гапирилмоқда. Нима, улар терактларни қўллаб-қувватлашлари мумкинлигини кутганлар бормиди? Туркия Президенти Ражаб Эрдўғон ҳам навбатдаги ифтор пайтида юз берган Истанбулдаги терактларни шиддат билан қоралаганини айтиб ўтирмаса ҳам бўлади. Террористлар теракт учун бу пайтни танглаганлари ҳам тасодифан эмас, чунки, исломийлашаётган Туркияда аскаралар ҳам рўза тутар экан, нимага аэропорт қоровуллари тутмасин?
Ислом терроризмининг илдизлари Ислом динининг Қуръонни хато тафсир қилиш натижасида шаклланган хато тушунчаларда эканлигини мен анчадан бери ёзмоқдаман. Ҳали буни тушунадиган одамлар кам.
Туркия Президенти Ражаб Эрдўғон ўз давлатини исломлаштириш билан машғуллигини назарда тутиб, АҚШ Президенти Барак Обамага ўтган йилининг бошларида ёзган хатимда ислом терроризмининг кейинги маркази Туркия ва Марказий Осиё бўлишини алоҳида тилга олган эдим. Мана ўшандан бери Туркияда тўхтовсиз терактлар бўлмоқда. Мен Отатурк аэропортида бўлган даҳшатли воқеалардан ҳамма каби даҳшатга тушдим, аммо ҳамма каби ҳайрон бўлмадим. Чунки, шундай бўлишига аввалдан ақлим етради.
Бундай терактларни на исломчи Ражаб Эрдўғон, на анти-исломчи Ислом Карим каби сиёсатчилар тўхтатишга қодир эмаслар. Террор аста-секин Марказий Осиёга ҳам кириб келади. Бунинг олдини олиб бўлмайди, аммо келажакни ўйлаб, ислом терроризмининг Ислом динидаги илдизларини қуритиш керак. Бунинг учун эса, Ислом динида фундаментал ислоҳотлар қилиш ва Ислом дини иложи борича тезроқ дунёвийлик/секуляризм принципини қабул қилишига эришиш лозим.
Ислоҳотларнинг бошқа тарафлари ҳам бор. Масалан, динимизнинг ягона фарзи имон эканлиги тан олиниши, ҳозиргача янглишлик билан фарз ҳисобланиб келаётган 5 маҳал номоз, рўза, ҳаж ва закот - қилинса савоб, қилинмаса гуноҳ бўлмаган амалиётлар қаторига ўтказилиши шарт. Чунки, айнан шу амалиётлар одамларни фанатиклаштиради, фанатиклик билан террористлик ораси - ярим қаричдир, холос.
