09 June 2016
01:51 - Жаҳон давлатларининг хавфсизлик даражаси бўйича рўйхатида Ўзбекистонга 109-чи ўрин берилибди
Дунё давлатларининг турли кўрсатгичлар бўйича рейтинглари рўйхатини тузувчи халқаро ташкилотлар хира пашшадек кўпайиб кетгани ҳозир ҳеч кимга сир эмас. Мана ўшандайлардан яна биттаси дунё давлатларининг хавфсизлик даражаси бўйича рўйхатини эълон қилибди. Қароргоҳи Австралиянинг Сидней шаҳрида жойлашган Vision of Humanity ташкилоти жаҳоннинг 162 давлатидаги хавфсизлик даражасини ўзича ўлчаб, уларни бир рўйхатга тиркабди.

Бу рўйхатнинг бошида хавфсизлик даражаси кучли бўлган давлатлар турибди: 1-чи ўрин Исланидияга берилган, ундан кейингги ўринларга Дания, Австрия, Янги Зелландия, Португалия, Чехия, Швейцария, Канада каби давлатлар қўйилган.

Қозоғистонга 75-чи, АҚШга эса 103-чи ўрин берилганидан тушуниш мумкинки, бу рўйхат масхарабозликдан бошқа нарса эмас. Ўзбекистонга 109-чи ўрин берилиши эса, бу рўйхатнинг маъносини умуман йўққа чиқаради.

Vision of Humanity ташкилотининг сайтидаги харитада 162 давлат ичида Сурияга 163-чи ўрин берилгани устидан кулишни ҳаим йиғлашни ҳам билмайсан. 162-чи ўрин эса Суданга, 161-чи ўрин Ироққа, 160-чи ўрин Афғонистинга берилганини тушуниш мумкин. Дарвоқе, Украинага 156-чи, Россияга 151-чи ўрин берилиши устида ҳам тортишиш мумкин.

Ҳа, ростдан ҳам жаҳон мураккаб жараёнлар ичида. Уларни тўғри баҳолашга ҳамманинг ҳам кучи етавермайди. Аммо, воқеаларни баҳолашда “Ҳаракат”га ҳеч ким тенглашолмаслигини тан олиш лозим.
« Олдинги хабар Хабарлар рўйхати Кейинги хабар »