Аввалги хабарларимиздан маълумки, 20 май куни Туркия Буюк Миллат Мажлиси жиддий жиноятларга алоқаси борлиги ҳақида етралича маълумотлар бўлган депутаталарнинг даҳлсизлигини бекор қилиш қонунини қабул қилган эди. Бу қонун Туркия Конституциясида депутатларга берилган мутлоқ даҳлсизликка доир моддаларни ўзгартиради. Кеча Президент Ражаб Эрдўғон бу қонунни имзолади. Бугун бу қонун расмий газетада эълон қилингач, у расман кучга киради.

“Миллиёт” газетасида айтилишича, Конституцияга киритилган ўзгаришлар кучга киргач, шу пайтгача тайёрланган 800 айбнома асосида 152 депутатнинг иши кўрилишга бошланиши мумкин. Бундай депутатларнинг партиялар бўйича сони қуйидагича:

Адолат ва Тараққиёт Партиясидан – 29 депутат
Жумҳурият Халқ Партиясидан – 57 депутат
Халқларнинг Демократик Партиясидан – 55 депутат
Миллиётчи Ҳаракат Партиясидан – 10 депутат

Айбномалар 15 кун ичида тегишли прокуратура органларига юборилади. Бу органлар баъзи ишларни бекитишлари ҳам мумкин. Иши судга ўтказилганларга жазони айнан суд беради. Айбдор деб топилганлар озодликдан маҳрум этилади, айбдор деб топилмаганлар озод қилинади.

Газетада ёзилмаса ҳам айтиш мумкинки, курдларга оид Халқларнинг Демократик Партиясидан бу рўйхатга кирганларнинг кўпчилигига террорни оқлаш ёки уни қўллаб қувватлаш каби айблар қўйилган. Бошқа партиялардан бу рўйхатга кирган депутатларнинг кўпчилигига порахўрлик, коррупция, ўз мансабини суиистеъмол қилиш каби айблар қўйилган бўлса керак.

Эслатиб ўтамиз, бу партияларнинг парламентдаги депутатлари сони қуйидагича: АТП - 327, ЖХП – 135, ХДП – 53, МҲП – 35.

Ишларнинг бу йўналишда кетиши - Туркиянинг сиёсий саҳнасида жиддий ўзгаришларга йўл очиши муқаррар.