04 June 2016
21:23 - Владимир Путин Россияни кризисдан чиқаришни феълан ўзининг маслаҳатчисига айланган Алексей Кудринга топширгани аниққа ўхшайди

Бир вақтлар Санкт-Петербург мэри Собчакнинг командасида иш бошлаб, ўша ерда Путин билан танишган ва ўшандан бери айнан Путиннинг командасида бўлган, 2000-2011 йиллари Россия молия вазирлигини бошқариб келган, аммо Дмитрий Медведев билан чиқишаолмагани сабабли ҳукуматдан отилган Алексей Кудрин катта сиёсатга қайтаётганини, тўғрироғи, Путиннинг ўзи тарафидан қайтарилаётганини аввал хабар қилган эдик. Айнан ўша кунлари Алексей Кудрин Россия Президенти қошидаги Иқтисодий Кенгаш раисининг ўринбори этиб, айни замонда, расман мустақил ташкилот ҳисобланса ҳам, феълан ҳукуматнинг асосий аналитик марказларидан бири бўлган Стратегик Тадқиқотлар Марказининг раиси қилиб тайинланди ва, кўринишидан, Путиннинг иқтисод масалалари бўйича феълан бош маслаҳатчисига айланди.

Бугун ўрис ахборот воситалари билдиришича, Алексей Кудрин журналистлар билан учрашиб, ўзи қилаётган ишлар ҳақида маълумотлар берибди.

У ўзи раҳбарлик қилаётган Стратегик Тадқиқотлар Маркази 2017 йилнинг ўрталаригача Президент Путин учун мамлакатнинг янги ривожланишлар стратегиясини ишлаб чиқариш устида иш бошлаганини айтган ва бундай стратегияни амалга ошириш учун ҳокимиятда ҳам ислоҳотлар ўтказиш лозимлигини уруғулаган. Унинг бу фикри қанчалик муҳим эканлигини ҳамма тушунса керак.

Унинг гапларидан кўриниб турибдики, Кудриннинг мақсади нафақат иқтисодни эмас, балки, ҳокимиятни ҳам ислоҳот қилиш. Ҳеч шубҳа йўқки, Кудрин ўз мақсадларини Путин билан маслаҳатлашиб, унинг розилигини олгандан кейингина ҳамма билдирмоқда.

Битта нарса аниқ, дейди мухбиримиз, Путин Ғарб санкциялари остида қолган Россияни ҳокимиятнинг мавжуд структуралари доирасида қайтадан оёққа турғазиб бўлмаслигини тушуниб етган ёки Кудрин уни бунга ишонтирган. Кудрин ҳақлигини тан олиш керак. Россия инқилобий ўзгаришларсиз олға кетолмайди, инқилобий ўзгаришлар лозим. Аммо, Кудрин яхши стратегиялар ишлаб чиқса ҳам, руслар буни ҳазм қилишга тайёрмилар? Агар, бу стратегиялар доирасида Ғарб олдида чекиниш ҳам ҳисобга олинган бўлсачи?