24 May 2016
01:33 - Истанбулда Дунё Инсонпарварлик Саммити иш бошлади
23-24 май кунлари Истанбулда Бирлашган Миллатлар Ташкилоти тарафидан Дунё Инсонпарварлик Саммитининг биринчиси ўтказилиши, унга 125 давлат вакили келиши, улардан 50 нафари давлат президентлари ёки бош вазирлари бўлиши ҳақида 16 майда “Ҳаракат” ҳам хабар берган эди. Кеча бу саммит иш бошлади, кечқурун Истанбулдаги машҳур Долмабоғча саройида Туркия Президенти Ражаб Эрдўғон саммит иштирокчилари учун зиёфат берди (расмда).

Аммо, туркларнинг хабарларидан бу саммитга юқори даражали жаҳон лидерларидан кимлар келганини тушуниш қийин. Узуқ-юлиқ хабарлардан тушунса бўладики, бу тадбирга БМТ Бош котиби, Озорбайжон Президенти, Филистин мухториятининг раҳбари каби лидерлар қатнашган. Германия канцлери Ангела Маркел саммитнинг бошланишида иштирок этиб, Ражаб Эрдўғон билан кўришгани ҳақида ҳам хабарлар бўлди, аммо у кечқуринги зиёфатда иштирок этгани ҳеч қаерда тилга олинмади. Кўринишидан, у бирров Истанбулга келган ва Ражаб Эрдўғонга замонавий демократия ҳақида қисқа лекция ўқиб, тезда уйига қайтиб кетган.

Тахмин қилиш мумкинки, Туркияда янги диктаторлик яратилаётганидан ташвишга тушган жаҳон лидерлари, айниса, демократик дунё лидерлари, Истанбулдаги саммитга келмасдан, у ерга ўз вакилларини жўнатиш билан чекланишган. Вакиллар асосан Туркиядаги элчилар бўлган бўлса керак.
« Олдинги хабар Хабарлар рўйхати Кейинги хабар »