21 May 2016
18:15 - Алексей Кудрин катта сиёсатга қайтди ва Россия иқтисоди чуқур ислоҳотларсиз кризисдан чиқолмаслигини гапирди. Ўзбекларга нима?

Бир вақтлар Санкт-Петербург мэри Собчакнинг командасида иш бошлаб, ўша ерда Путин билан танишган ва ўшандан бери айнан Путиннинг командасида бўлган Алексей Кудрин ўша мураккаб замонларнинг мураккаб шахси, сиёсатчиси ва иқтисодчисидир. Ўша пайтларда эгри ишга қўл уриш оддий воқеа эди. Кудрин ҳам истисно эмаслигини тахмин қилиш қийин эмас.

Айнан Кудрин Россия молия вазирлигини бошқариб келган 2000-2011 йиллари Россиянинг иқтисоди ўта кучайган эди. Аммо, унутмайликки, айнан ўша йиллари нефтнинг нархи осмонларга сапчиганди. Балки, ҳамма гап Кудринда эмас, нефтнинг нархида бўлгандир. Бироқ, Кудрин ўз соҳасида катта тажрибага эга эканлиги ва ҳақиқий бозор иқтисоди тарафдори эканлиги шубҳасиз.

Путин учинчи марта президент бўлиб сайланишга ҳаққи бўлмагани сабабли, 2008 йили ўзи Бош вазир курсисига ўтириб, қўғирчоғи Медведевни президент қилиб қўйганда, Кудрин Медведевни менсимади, ўрталарида жанжаллар чиқди. Путин ноиложликдан дўсти Кудринни вақтинча ҳукуматдан ва катта расмий сиёсатдан узоқлаштирди.

Кудрин ўша пайтда мухолифатчиларнинг Болотний майдонидаги намойишларида иштирок этишгача бориб, ўша минтинглардан бирида вақтидан аввал парламент сайловлари ўтказишга чақирди. Бироқ, кейин яна ҳокимиятга яқинлаша бошлади.

Путин сўнги йилларда ўз дўстини қайтадан катта сиёсий саҳнага олиб чиқиш ҳаракатида бўлган эди, ниҳоят шу йил 30 апрелда уни Россия Президенти қошидаги Иқтосодий Кенгаш раисининг ўринбори этиб тайинлади.

Бугун Алексей Кудрин ўрисларнинг қайсидир телеканалидаги "Вести в субботу" эшиттиришида Россия Президенти қошидаги Иқтосодий Кенгаш раисининг ўринбори сифатида чиқиш қилиб, айнан шундай деди: “Иқтисодий тушишнинг “тубидан” ўтдик, шекилли, ҳар ҳолда шунга яқинмиз. Аммо, афсуски, иқтисодимизнинг модели эски, ишлатиб бўлинган модель, янгиси ҳали шаклланмади. Шундай экан, тушишнинг “тубида” қолиб кетаверамиз. Ўйлайманки, иқтисодимизга нисбатан қатъиятлик етишмаяпти. Биз муҳим ислоҳотларни вақтида қилмаяпмиз. Бу нарса иқтисодий ўсишнинг бошланишини орқага сурмоқда”.

Кўриниб турибдики, унинг “қатъиятсизлик етишмаятганлиги”, “янги модель йўқлиги” ва “иқтисодий ўсишнинг бошланишини орқага сурилаётгани” ҳақидаги сўзлари Медведевга тош отишдир. Бошқа тарафдан, у қандай ислоҳотлар ҳақида гапирмоқда? Табиий, у ўз ҳаёлидаги ислоҳотларни назарда тутмоқда. Демак, унинг ўз модели ва ислоҳотлар дастури бор.

Қизиқ, Путин уни Бош вазир қилмоқчи эмасми?

Агар Кудрин ростакам муҳим ислоҳотлар ҳақида ўйлаётган бўлса, уни ҳамма қўллаб қувватлаши керак. Ҳатто, ўзбеклар ҳам. Чунки, Россияда ишлаётган мардикорларимиз Ўзбекистонга юбораётган пул билан давлатимизнинг бюджети, демак, иқтисоди ҳам, оёқда турганини унутмайлик.