“Ҳаракат” Агентлиги 2014 йил 31 январдаги “Бангладешда исломчи партиянинг лидерларига бирин-кетин ўлим жазоси берилмоқда” номли хабарида бу мамлакатнинг Читтагонг шаҳар судида Жамоат-и Исломий Партиясининг лидери ва яна 13 кишига ўлим жазоси берилганини билдирган эди.

Қизиғи шундаки, уларга 1971 йили Бангладеш Покистондан мустақил бўлиш учун кураш олиб бораётганда Покистон билан ҳамкорлик қилишдан бошлаб, 2004 йилда Ҳиндистоннинг Ассам Эркинлик Фронтини қурол билан таъминлашгача бўлган айблар қўйилган.

Ўлимга маҳкум қилинганларнинг баъзиларига нисбатан ҳукм ижро ҳам этиб бўлинди. Масалан, Associated Press агентлигига асосланиб 2015 йил 12 апрелда тарқатган хабаримизда шу партия лидери Муҳаммад Камаруззамон осиб ўлдирилгани, минглаб одамлар кўчаларга чиқиб, ўлим ҳукми ижро этилганини олқишлаганлари айтилган эди. Кўринишидан, у одам партиянинг лидери эмас, лидерларидан бири бўлган. Чунки, ҳозир тарқатилаётган хабарларда Жамоат-и Исломий Партиясининг лидери Мотир Раҳмон Низомий (расмда) осиб ўлдирилгани айтилмоқда.

Туркияда чиқадиган “Миллиёт” газетасининг кечаги сонида унинг ўғли Накибир Раҳмоннинг қуйидаги сўзлари келтирилган: “Отам ўлдирилганини менга телефон орқали Даккадаги Марказий қамоқхонадан билдиришди. Оила аъзоларимиз билан матонатли бўлиш учун ҳаракат қилмоқдамиз. Сабр этишдан бошқа чорамиз йўқ. Отам шаҳид бўлганига ишонамиз. У кўрсатган йўлдан кетаверамиз. Ҳамма мусулмонларни отам учун дуо этишга чақираман”.

Бангладешда бўлаётган воқеалар бўйича аввал берган таҳлилимизни такрорлаймиз:

“Бангладешда исломий партия лидерларнинг бу шаклда жазоланиши тасодифий эмас. 1971 йилда Покистондан ажралиб чиқиб мустақил бўлган бу мамлакатда ҳали ҳам тўла барқарорлик йўқ, ҳозир ҳокимиятда бўлган дунёвийчилар исломий партияларнинг кучланиб кетишидан кўрқмоқдалар.

Исломда чуқур ислоҳотлар ўтказилиб, Ислом дини дунёвийлик принципини тан олмаса, ўрта асрларга қайтмаслик учун, исломий партияларни куч билан ушлаб туришдан бошқа йўл йўққа ўхшамоқда.”

Ҳозир яна шуни қўшимча қилмоқчимиз: Ислом дини дунёвийлик принципини қабул қилса, ундан кейин исломий партиялар ўз-ўзидан йўқ бўлади.