06 May 2016
08:54 - Туркия Бош вазири ҳокимиятдаги партия раислигидан кетишини расман очиқлади. У Бош вазирликдан ҳам кетса керак. Ўрнига ким келади?

Кеча Анқарада ҳозир ҳокимиятда бўлган Адолат ва Тараққиёт Партиясининг Марказий Кенгаши ярим соатлик мажлис ўтказди. Партия раиси, айни замонда, Бош вазир Аҳмад Довудўғли 22 май куни партиянинг фавқулодда қурултойи бўлишини, партияга янги раис сайланишини, ўзи раисликка номзод бўлмаслигини билдирди. У ўз нутқида Президент Ражаб Эрдўғонга ўлгунча содиқ бўлишини урғулади, аммо нима сабабадн тўсатдан партия раислигидан кетаётганини айтмади. Бу бир заруратдир, дейиш билан чекланди. Табиий, демократиянинг уруғи ҳам бўлмаган исломчилар партиясининг расмий органларидан биронта одам ҳақиқий сабаб айтилиши кераклигини гапирмади.

Аммо, ҳеч шубҳа йўқки, у ҳозир Туркия Конституциясига хилоф равишда Туркиянинг хўжайинига айланб бўлган Ражаб Эрдўғоннинг талаби билан раисликдан кетмоқда. Яна ҳеч қандай шубҳа йўқки, у Бош вазирликдан ҳам кетади.

Бу партиянинг ҳам хўжайини бўлган Ражаб Эрдўғон бу воқеа ҳақида “раисликдан кетиш қарори - Довудўғлининг ўз қароридар” дейиш билан чекланди

Бундан ҳам қизиғи, мамлакатнинг ахборот воситалари партиянинг янги раиси бўлиши тахмин қилинаётган бир неча кишининг исмини тилга олмоқдалар. Уларнинг биринчиси – Эрдўғоннинг куёви, ҳозирда Энергетика вазири ва парламент депутати бўлган, 38 ёшли Берат Албайроқ (расмда).

Тахмин қилиш мумкинки, Ражаб Эрдўғон бунчалик шармандаликка бормайди, куёвини партия раиси ва Бош вазир қилдирмайди. Унинг қўғирчоғи бўлишни истайдиганларнинг сони эса етралича катта. Довудўғли қўғирчоқлик ролини яхши ўйнолмаганга ўхшайди.

Кўринишидан, Туркия катта ўзгаришлар арафасида, аммо уларнинг йўналиши аниқ – Эрдўғоннинг диктатурасини мустаҳкамлаш ва Туркияни исломий давлатга айлантириш.