05 May 2016
08:15 - Доналд Трампнинг охирги рақиби ҳам сайлов пойгасидан чиқди

АҚШда бу йил 8 ноябрда бўладиган президент сайловларида Республикачилар Партиясининг номзоди бўлиш учун курашаётган 3 кишидан биттаси бўлган Тед Круз кеча пойгадан чиққанини билдирган эдик. Маълум бўлишича, кеча яна бир номзод – Оҳайо штатининг губернатори Жон Касич ҳам пойгадан чиққанини эълон қилибди. Шундай қилиб,бу партиянинг номзоди бўлиш учун олиб борилаётган пойгада бир одам – миллиардер Доналд Трамп қолди.

Эслатиб ўтамиз, аввалига Доналд Трамп президентликка бу партиядан номзод бўлишига америкаликларнинг кўпчилиги ишонишмади, Республикачилар Партиясининг раҳабарияти эса, Трампнинг номзодлигига қарши эканлигини очиқча билдирди. Мана энди, Трапм бу партиядан номзод бўлишишининг эҳтимоллиги жуда ҳам катта бўлиб қолди. Ҳозир партия раҳбарияти ҳам бунга кўниканга ўхшайди.

Эслатиб ўтамиз, ҳозир сайлов кампаниясининг праймериз деб аталган бошланғич босқичи бўлмоқда. Бу босқичда АҚШдаги икки асосий партия - Республикачилар Партияси ва Демократик Партия - ҳамма штатлардаги ўз йиғилишларида ёз ойида бўладиган партия қурултойларининг делегатларини сайламоқда. Айнан ўша қурултойларда ҳозир праймеризда иштирок этаётган номзодлардан биттаси танланади ва ўша танланган номзод 8 ноябрда бўладиган асосий президент сайловида иштирок этади.

Ҳозир қурултойнинг ҳар бир делегати праймеризларда у ёки бу номзоднинг тарафдори сифатида сайланмоқда. Шу кунгача, масалан, Республикачилар Партияси қурултойига Доналд Трамп тарафдори бўладиган 1053 делегат сайланди. Қурултойда делегатларbнинг умумий сони 2476 та бўлади. Демак, 1237 ёки ундан кўп делегатнинг овозини олган номзод ғалаба қозониб, 8 ноябрдаги сайловда шу партиянинг ягона номзоди бўлиб қолади.

Бундан чиқди, июль ойида бўладиган ўз партиясининг қурултойида ғалаба қозониш учун Трампга ўзи тарафдори бўлган яна 1237-1053 = 184 делегат керак. Ҳали яна 10 тача штатда праймериз бўлади. Трамп тарафдорларининг сони 1237 дан ошиши аниқ қўринмоқда.

Шу нарсага ҳамманинг эътиборини қатаратишни истардикки, “Ҳаракат” ҳаммадан аввал республикачиларнинг праймеризида Доналд Трамп ғалаба қозониб, 8 ноябрдаги сайловда қатнашиши ва у ерда ҳам ғалаба қозонишини башорат қилган эди. Башоратимиз амалга ошиши аниқдек кўринмоқда. Башоратимиз шунчаки осмондан олинган нарса эмас.

Гап шундаки, АҚШнинг обрўси дунёда тушиб бормоқда. Бундай масалалар билан шуғулланадиган Таймс журнали 2015 йилнинг энг кучли сиёсатчиси деб Россия Президенти Путинни белгилади. Иккинчи ўринга Германия канцлери Ангеле Меркелни қўйди, Обама учинчи ўринда қолди. АҚШ иқтисодида ҳам барқарорлик бўлмаяпти. Демак, ҳозир АҚШга жиддий ишлар, балки, жиддий ўзгаришлар қиладиган президент керак. Трамп сиёсий саҳнага чиқиши биланоқ айнан жиддий ўзгаришлар кераклигини гапиришни бошлаган ва кўпчиликни шокка туширган эди. Бизнинг башоратимиз айнан шу фактга асосланганини урғуламоқчимиз.