17 April 2016
20:07 - Дохада бошланган нефть саммитида ҳали натижа йўқ, аммо бўладими?
Кечаги хабаримизда бугун Қатар давлатининг пойтахти Дохада бўладиган “нефть саммити” бутун жаҳоннинг диққат марказида эканлигини айтгандик. Маҳаллий вақт билан бугун эрталаб бошланиши керак бўлган йиғилиш тушдан кейин бошланди.

Саммитда нефть заҳираларидан нефть олишни чеклаш ва ҳатто камайтириш ҳақида қарор қабул қилиниши кутилмоқда. Агар нефть камайса, унинг жаҳон бозоридаги нархи тушиши тўхтаб, балки, юқорига кўтарилишга бошланишига умид қилинмоқда.

Нефть Экспорт қилувчи Давлатларнинг Ташкилотига (инглизчадан қисқартмаси: лотинча - OPEC, кирилча – ОПЕК) кирувчи мамлакатлар ичида нефть қазиб олиш бўйича 2-чи ўринда бўлган Эрон бу саммитда қатнашмаётгани ва нефть чиқариш ҳажмини Ғарб ўзига қарши санкциялар киритмасдан олдинги даражага, яъни бир кеча-кундузда 4 млн баррелга чиқармагунча камайтирмаслигини эълон қилаётганидан ҳам кўриш мумкинки, Дохадаги саммитдан жиддий қарорлар чиқишини, бундай қарорга ҳамма бўйсунишини кутиш қийин.