16 April 2016
21:30 - Ислом Ҳамкорлик Ташкилотининг саммити исломофобия ва террорга қарши курашга урғу берувчи Истанбул Декларациясини қабул қилиш билан битди
Саммит қатнашчиларининг кўпчилиги кеча Ражаб Эрдўғон бошчилигида жума номозига борганларини ҳисобга олсак, саммит кеча пешингача битганини тушуниш мумкин.

Саммитининг жума кунги йиғилиши аввалдан тайёрланган Истанбул Декларацияси номли ҳужжат лойиҳасини муҳокама қилиш ва қабул қилишга бағишлангани Туркиянинг Анадолу давлат хабар агентлигининг қисқа хабаридан билинади.

Асосан умумий гаплардан иборат бўлган Декларацияда қуйидаги нуқталарга урғу берилган:

- Ғарбда чет элликларга нисбтан душманлик руҳи, исломофобия ва мусулмонларга қаши ирқчилик ҳаракатлари ортгани ва суриялик қочқинларнинг тақдири хавотирлик уйғотмоқда.

- Филистин ҳудудларининг Исроил ишғоли остида қолиши, баъзи ҳудудлар қонунларга хилоф равишда Исроил тарафидан ўзлаштириб олинаётгани, филистинликларнинг уйлари бузиб ташланаётгани, ўзлари ўлдирилаётгани, қамашлар кўпайгани ва Ғазонинг блокада қилинганлиги қораланади.

- Ишғолчилар ишғоли остидаги ҳудудларни яҳудийлаштириш, Ҳареми-шарифнинг муқаддасилигини бузишга ҳаракат қилиш қораланади, Қуддуснинг исломий ўзлигини сақлаб қолишга дунё жамоатчилигини эътиборини тортиш кераклиги урғуланади.

- Ислом Ҳамкорлик Ташкилоти иложи бор ҳамма имкониятлардан фойдаланиб террорга қарши курашга қарорли эканлиги урғуланади.

Декларацияда, кенгайиб бораётган терроризмнинг, аслида, ислом терроризмининг илдизлари ва сабаблари ўрганишга ҳаракат қилинмаган, демак, ИҲТ террорга қарши ҳеч нарса қилмоқчи эмас, қилолмайди ҳам. Дунёда исломофобиянинг кучайиб бориши эса, тўғридан-тўғри ислом терроризмининг кўлами ортиши билан боғлиқ бўлганини ҳисобга олсак, ИҲТ исломофобияга қарши ҳам ҳеч нарса қилишга қодир эмаслиги ўз-ўзидан маълум.

Ислом терроризми ва у билан боғлиқ бўлган исломофобияни камайтириш ва охир-оқибатда йўқ қилишнинг ягона йўли - Ислом дини тарафидан дунёвийлик/секуляризм принципини қабул қилишдир. Буни тушунмайдиган Ислом Ҳамкорлик Ташкилоти Ислом Дунёси учун биронта фойдали иш қилолмаслиги аниқ. Демак, авваламбор Ислом Ҳамкорлик Ташкилотига бу масалалар бўйича дарс бериш керакка ўхшайди.