06 April 2016
15:30 - АҚШда президент сайлови кампанияси: Доналд Трамп Висконсин штатидаги праймеризни ютқазди, аммо умумий ҳисобда барибир олдинда
Кеча Висконсин штатида иккала партия (республикачилар ва демократлар) бу йил 8 ноябрда бўладиган президентлик сайловларининг бошланғич босқичини (праймериз) ўтказдилар.

Республикачилар партиясининг праймеризида умумий ҳисоб бўйича 2-чи ўринда келаётган Тед Круз ғалаба қозонди. Умимий ҳисоб бўйича 1-чи ўринда кетаётган миллиардер Доналд Трамп катта ҳисоб билан мағлубиятга учради.

Маълумки, Республикачилар Партияси қурултойида 1 минг 237 ёки ундан кўпроқ делегатнинг овозини олган номзод ғалаба қозонади ва партиянинг президентликка номзоди бўлади. Доналд Трамп тарафдори бўлган делегатларнинг сони бугунгача 746 бўлди. Тед Круз тарафдори бўлган делегатларнинг сони 510, 3-чи ўринда келаётган Жон Касич тарафдори бўлган делегатлар сони 145.

Қаранг, Трамп тарафдорларининг сони Круз тарафдорлари сонидан 236 га кўп. Роппа-роса 1 ой аввал бу фарқ 83 эди.

Демократлар Партиясининг қурултойида президентликка номзод бўлиш учун 2 минг 383 делегатнинг овози керак. Висконсин штатидаги демократларнинг праймеризида ҳам умумий ҳисобда 2-чи ўринда келаётган одам, яъни Берни Сандерс ғалаба қозонди, 1-чи ўринда келаётган Ҳиллари Клинтон мағлубиятга учради. Аммо, партия қурултойида Ҳиллари Клинтон тарафдори бўладиган делегатларнинг умумий сони 1773 бўлса, Берни Сандерс тарафдорларининг умумий сони 1094.
« Олдинги хабар Хабарлар рўйхати Кейинги хабар »