Шоиримиз Юсуф Жуманинг янги шърларидан бирини эътиборингизга ҳавола қиламиз.

ТУЛ ЭЛГА

Дунёнинг кўчасини
Супурганингча, ўзбек,
Оқсаройни тозалаб,
Бўлсангчи юртингда бек.

Сиртлонни қўйиб тахтга,
Илонни қўйиб тахтга
Ўзинг мардикор бўлиб
Бош олиб кетдинг четга.

Ўлдирилди эрларинг,
Тул эл бўлдинг, тул бўлдинг.
Ёрингга олам ҳарам,
Сен бичилган қул бўлдинг.

Боболаринг йўлидан
Тойганинггга кўп бўлди.
Аёлингни қизғанмай
Қўйганингга кўп бўлди.

Зиёлинг шоирларинг
Сарой ялоғида тўқ.
Подшонинг ҳарамида
Ноэр бўлмагани йўқ.

Аждод ушлаган шамшир
Супурги ушламаган.
Остонасидан жаҳон
Супургидай тушмаган.

Ёвуз тождор бахтига
Қўрқоқлигингдир ривож.
Онасининг гўрини
Этсангчи бошига тож.

Тилингда йўқ эрку ҳақ,
Тилингда иш, сарқит, нос.
Ўзбек, ё ёвузни бос,
Ўзбек, ё ўзингни ос!

Супурги ушлагунча
Ушламайсанми қурол.
Ёву сотқин остидан
Юртингни бошингга ол!

23 март, 2016 йил