АҚШда бу йил бўладиган президентлик сайловларида Республикачилар Партиясининг номзоди бўлиш учун кураш олиб бораётган Доналд Трамп кеча Вашингтон Пост газетасига берган ва газетанинг Интернетдаги сайтида кеча кечқуруноқ эълон қилинган интервьюсида ўз мамлакати кучли рецессияда, яъни тушишда эканлигини айтиб, президент бўлиб сайланса, уни бу аҳволдан олиб чиқа олишини урғулади.

Доналд Трамп биринчи навбатда молиявий ва иқтисодий рецессияни назарда тутаётган эди. Шу сабабли, ҳозир фондлар бозорида инвестиция қилиш учун оғир аҳвол эканлигини ҳам гапириб, Нью-Йорк фондлар биржасининг одамлари аввалари кўп марта янглиш башоратлар қилишгани туфайли уларга ишонмаслигини таъкидлаган.

Доналд Трамп умуман олганда ҳақ, дейди мухбиримиз. Нью-Йорк фондлар биржасидаги аҳволни “Ҳаракат” сайти ҳам кузатиб бораётганини ўқувчиларимиз билашади. Шу масалага оид таҳлилларимизда биржанинг экспертлари хато таҳлилллар беришаётгани, биржадаги сўнги йилдаги барқарорсизликнинг асосий сабаби – АҚШда сиёсий барқарорлик йўқлиги эканлигини кўп марта ёзган эдик.

Бу масалада ҳам “Ҳаракат” агентлиги ҳақ чиқаётганлигини бир четга қўйиб, ҳозир бошқа бир мавзуни қисқа бўлса ҳам тилга олишни истардик.

АҚШда рецессия фақат молия ва иқтисодда эмас, ҳаётнинг ҳамма соҳаларида юз бермоқда. Муҳожирлар ва ислом терроризми каби муаммоларни АҚШлик сиёсатчилар, тадқиқотчилар ва журналистлар яхши тушунмасликлари кўриниб турибди. Айнан шу муаммоалар ҳам АҚШ демократиясининг оёғига болта уриши муқаррар эканлигини ҳам бу ерда ҳали кўпчлик тушунмаяпти.

Шундай вазиятда, жамиятнинг эътиборини стратегик масалаларга қаратиш мақсадида шок терапияси усулида гапирадиган Доналд Трампдек одамнинг ўртага чиқиши табиий эди, ҳозир айнан шундай бўлмоқда.

Мен АҚШ Президенти Барак Обамага шу йил 1 февралда ёзган хатимни, дейди “Бирлик” лидери Абдураҳим Пўлат, шундай тугатган эдим:

“Мен аминманки, жаноб Доналд Трамп ҳақли. У анчагина қўпол гапираётган бўлса ҳам, аслида, америкаликларнинг эътиборини 21-чи асрнинг асосий чақириғи бўлган ислом терроризмига тортмоқда. Америкаликлар уни эшитишди. Бу яхши нарса. Кейинги қадам бу муаммони ечиш йўлидаги ҳаракатлар бўлади.” (Бу хатнинг инглизча ва ўзбекча вариантлари 2 ва 3 февралда “Ҳаракат” сайтида ҳам эълон қилинган).

Кўпроқ Демократик Партия тарафдори бўлган Вашингтон Пост газетаси ҳам республикачи Доналд Трамп билан интервью ўтказиб, унинг кўпчилик учун кутилмаган фикрларини эълон қилишга жураът қилгани кўрсатмоқдаки, америкаликлар Доналд Трампга қулоқ солишга бошлашди. Вақти келади, менга ҳам қулоқ солишга мажбур бўлишади.