03 April 2016
01:30 - Туркия Президенти Вашингтонга яқин жойда АҚШдаги энг катта жоменинг очилишида нутқ сўзлаб, Ғарбни исломофияда айблади

Кеча АҚШнинг пойтахти Вашингтонга ёпишган Мэриленд штатида, таркибида АҚШнинг энг катта жомеси ҳам бор бўлган, Америка Диёнат Маркази расман очилди. Очилишни Туркия Президенти Ражаб Эрдўғон қилди ва катта нутқ сўзлади. Бу жоме АҚШдаги энг катта бўлишидан ташқари икки минорали биринчи жоме бўлди.

Шундай гўзал жоменинг пайдо бўлиши муносабати билан Оллоҳга чексиз миннатдорчиликлар билдирган Туркия Президенти мусулмонларга қарши кайфият кучайиб бораётган пайтда Вашингтоннинг биқинида мусулмонларнинг диний марказини қуришга рухсат берган Америкага раҳмат айтган ёки айтмагани хабарларда тилга олинмайди.

Аммо, Ражаб Эрдўғон ўз нутқида Ғарбда кучайиб бораётган исломифобияни, яъни мусулмонларга ва умуман Ислом динига бўлган салбий кайфият, обу-ҳавони танқид қилишга катта эътибор берган. У 2001 йил 11 сентябрда 3 минг кишининг ўлимига сабаб бўлган Нью-Йоркдаги исломчи террористларнинг ҳужумлари туфайли умуман Ислом дини ва ҳамма мусулмонларга қарши кайфият кучайганидан нолибди, АҚШда президентликка номзодлар ҳам шу кайфият йўналишида гапиришаётганини танқид қилибди, Туркиянинг ўзида бўлаётган террористик ҳужумлар АҚШ ва Европадаги терророистик ҳужумлардан кўпроқ даҳшатли бўлаётганини урғулабди, орада Фатхулла Гулен тарафдорларига ҳам тош отиб ўтибди.

Муҳим бўлгани шундаки, Туркия Президенти исломофобияни йўқ қилиш ёки камайтириш учун мусулмонларнинг ўзи нима қилишлари кераклигини мутлақо гапирмаган. Шундай экан, минг афсуски, Америка Диёнат Марказининг очилиши ҳам, Ражаб Эрдўғоннинг очилиш пайтидаги нутқи ҳам, Америкада исломофобиянинг кучайишига туртки бўлади, холос. Ваҳолангки, айнан бунинг тескарисини қилишга ҳаракат қилиш керак эди.