14 March 2016
07:10 - Анқарадаги теракт қурбонлари сони 34 га чиқди, террористлар кимлиги айтилмяпти
Кеча кечқурун Анқаранинг Қизилой майдонида шаҳар автобусилари тўхтайдиган жойда бир юк автомобилини портлатган террорчилар кимлиги ҳақида аниқ маълумот йўқ. Туркия ички ишлар вазири Эфкан Ала террорни кимлар уюштиргани, кимлар уни амалга оширгани ҳақида кўп нарсани билганларини гапирди, аммо эртагача буни айтмаймиз деди.

Соғлиқ сақлаш вазири эса, қурбонлар сони 34 га, ярадорлар сони 125 га чиққанини айтар экан, 19 киши жуда оғир аҳволда эканлигини урғулади. Демак, қурбонлар сони яна ортади.

Туркия Президенти Ражаб Эрдўғон ва Бош вазири Аҳмад Довутўғлининг расмий баёнотлари бундай фожеалаи воқеа учун оддий деса бўладиган гапларни такрорлашдан иборат: террорчиларни топамиз, жазолаймиз, бизни ҳеч ким тиз чўктиролмайди, ҳалок бўлганларга Оллоҳдан раҳмат, уларнинг яқинларига сабр-тоқат, ярадорларга тузалиб кетишларини тилаймиз.

Мамлакатнинг мукхолифат партиялари, жумладан курдларнинг партияси ҳам шу каби баёнотлар тарқатдилар.

Ҳукумат оммавий ахборот воситаларига вақтинчалик бу теракт ҳақида расмий хабарлардан бошқасини тарқатмаслик ҳақида буйруқ берди. Оммавий ахборот воситалари дўст мамлакатларнинг раҳбарларидан терактни қораловчи ва турк халқига ҳамдарлик билдирувчи баёнотлар келаётганини айтмоқдалар.

Рус ахборот воситаларида айтилишича, Владимир Путин ва Дмиртий Медведев ҳам Анқарадаги терактни қораловчи баёнотлар беришган.
« Олдинги хабар Хабарлар рўйхати Кейинги хабар »