АҚШда мажбуран яшаётганимдан бери бу ерда 3-чи янги президент сайланмоқда. Жорж Буш президентликка сайланаётганда бу воқеа билан ортиқча ишим ҳам бўлмаган эди. Чунки, ўшанда мен бир неча йил ичида Ўзбекистонга қайтишимга ишонар эдим, АҚШдаги ички сиёсий воқеалар билан ҳам ортиқча ишим йўқ эди. 2001-2003 йиллари узоқдан туриб, “Бирлик”нинг Ўзбекистон ичида қайтадан оёққа туриш жараёнини бошқардим. Ўшанда ҳеч ким ҳаёлига ҳам келтиролмайдиган ишни қилдик, “Бирлик” халқ ҳаракатини “Бирлик” Халақ Ҳаракати Партияси сифатида қайтадан оёққа турғаздик.

2008 йилдаги АҚШ президентлигига сайловолди кампанияси бошланар экан, у воқеаларни шунчаки яқиндан кузатдим. Барак Обама президент бўлишини дунёда биринчи бўлиб башорат қилган сиёсатчи бўлдим. Бу янги президент чиройли гапиришга уста бўлса ҳам, амалда ҳеч нарса қилолмади. Владимир Путин уни ёш боладек алдаб юриб, кўп масалаларда ўз мақсадига эришиб олди. Аммо, ҳали кураш битмади.

Мана ҳозир АҚШда навбатдаги президент сайловлари арафасидамиз. Республикачилар Партиясидан президентликка номзод бўлиш учун кураш бошлаган Доналд Трампнинг биринчи чиқишлариёқ менда қизиқиш уйғотди. У худди мен каби шок терапияси усуллари билан гапирарди. Чунки, АҚШдек давлат 21-чи асрнинг янги муаммолари қаршисида қолар экан, буни америкалакларга тушунтириш, оддий америкаликлар учун кутилмаган йўналишларда ҳаракат қилиш лозимлини ҳаммага англатиш учун “шок терапияси” усуллари керак эди. Доналд Трамп бу усулларни ишлатди ва тезда президентликка номзод бўлиш ниятидаги республикачилар ичида биринчи ўринга чиқиб олди.

АҚШда сайлов олди кампанияси ва бу кампания доирасида турли номзодларнинг сайловчилар билан учрашувлари қанчалик муҳташам шаклда ўтказилаётганини телеканалларда кўп марта кўрган бўлсам ҳам, уларниннг биронтасида иштирок этмаган эдим. Аммо, бу йил уларда иштирок этиб кўриш ва бўлаётган воқеаларни шахсан кўриш ниятим пайдо бўлди.

Бир неча кун аввал мен яшайдиган Виржиния штатида Доналд Трампнинг шундай учрашувларидан бири бўлди. Ўша учрашувда иштирок этиш учун аввалдан Интернет орқали ариза бердим ва таклифнома олдим. Аммо, вақтим йўқлиги учун учрашувга боролмадим.

Кейин, 9 март куни Доналд Трамп қўшни штатларидан бирида сайловчилар билан учрашиши ҳақида хабар олдим. Учрашувда қатнашиш учун Интернат орқали ариза юбордим, Интернет орқали таклифнома олдим ва ўша ерга боришга қарор қилдим.

9 март куни оила аъзоларимни ҳам ўзим билан олиб, Шимолий Королина штатига қараб йўлга чиқдик. Биз учрашув бўладиган усти ёпиқ стадионга етиб келганимизда, учрашув бошланишига 3 соат вақт бўлишига қарамасдан, жуда кўп одам у ерга келиб бўлгани, стадион атрофида сон-саноқсиз тартиб сақлаш билан машғул бўлган одамлар турганиини кўриб ҳайрон қолдим. Ҳа, ростдан ҳам америкаликлар терактлардан қўрқиб, катта қамоқхонада каби ҳаёт кечиришаётгани кўриниб турарди. Дарҳол, тушундимки, эҳтиёт бўлиш керак.

Шундай бўлса ҳам, ўша учрашув ташиклотчиларига ўхшаб кўринган, жуда яхши кийинган одамлардан бирининг олдига бориб, ўзимини таништирдим ва Доналд Трамп командасига кирувчи биронта расмий билан кўришиб, АҚШ Президенти Барак Обамага ҳозирги сиёсий вазият ва Доналд Трамп ҳақида ёзган хатларимни топшириш ниятим борлигини айтдим.

У одам мендан жуда нозик илтифотилик билан бир неча дақиқагина кутишни сўради, мен “хўп” дедим. Ростдан ҳам бир неча дақиқа ўтмасдан 2 киши олдимга келди. Дарҳол маълум бўлдики, улар Доналд Трамп ва унинг командасига ҳеч қандай алоқаси бўлмаган давлат хавфсизлик хизмати одамлари экан. Улар ўта назокатли шаклда мени сўроққа тутишди, мен улардан ҳам кўпроқ назокат билан ўзим ҳаққимда улар кутгандан 10 баравар кўп информация бердим. Ҳеч қўрқмасдан айтаманки, уларнинг оғзи очилиб қолди.

Тахминан 1 соатча давом этган суҳбат, аслида, сўроқдан кейин, “энди кетсам бўладим, ёки мени қамайсизми?” дедим уларга, табиий, кинояли ҳазил билан. Улар менга ҳеч қандай эътирозлари йўқлигини айтишди, мен эса уларга “хафа бўлманг, аммо сиз қилаётган иш АҚШдек давлатнинг ўлим йўлига кетишининг кўрсатгичидир” дедим ва улар билан ўта назокат билан хайрлашдим.

Оилам ўтирган автомобиль олдига келганимдан кейин билдимки, бу вақт ичида хавфсизлик хизматларининг одамлари келиб, ўта назокат билан атомобилимнинг ҳамма жойини текширишибди, табиий, улар терактдан қўрқиб, қурол қидиришган.

Мана, АҚШнинг аҳволи. Бу давлат расмийлари ислом терроризмидан қутилишнинг йўли бундай тинтувлар ўтказиш эмас, Ислом дини дунёвийлик принципини тан олиши эканлигини тушунмаётганлари ачинарлидир.

Ишонаманки, Доналд Трамп барибир президент бўлади ва, умид қиламанки, Ислом терроризмига қарши ибтидоийликдан узоқроқ бўлган йўллар қидиришга бошлайди.

Ҳа, дарвоқе, хавфсизик хизматининг одамлари билан гаплашгандан кейин тушундимки, Доналд Трамп билан театр спектакали каби тайёрланган учрашув бўладиган стадионга кирмаганимиз яхши. Чунки, у ерга кирсак, назорат остида бўлганимиз сабабли, учрашув биз учун маъносини, учрашув ташкилотчилари ва хавфсизлик хизматчилари эса, хузур-ҳаловатини йўқотади.

Шундай қилиб, усти ёпиқ стадионга ҳам кириб ўтирмасдан, бир неча соатлик оилавий саёҳат қилиш билан чекланиб, орқага қайтдик.