06 March 2016
17:45 - Путин Россияни динийлаштиришни давом эттирмоқда: Машҳур олий ўқув юртида православларниннг черкови очилди
Россия Президенти Владимир Путин ўз мамлакатининг жаҳонда тушиб бораётган мавқеини тиклаш мақсадида руслар ичида патриотизмни кучайтириш йўналишида пропаганда ишларини кучайтириш билан бир қаторда Россия давлатини динийлаштириш, тўғрироғи, православлаштириш ҳаракатига тушгани кўриниб турибди.

Аввал собиқ СССРда, ҳозир Россияда замонавий ривожланишларнинг рамзи бўлган МФТИда (Москва Физика-Техника Институтитда) 2012 йили Теология (Тангри ва ишонч масалари билан шуғулланадиган фан) кафедраси очилган эди. Рус Православ черкови раҳбари Патриарх Кириллнинг яқинда Лотин Америка давлатлари бўйлаб саёҳати, ўша саёҳат доирасида Кубада Рим Папаси билан учрашуви, бугун эса Москва Халқаро Муносабатлар Давлат Университетида черков очилиши - тамомийла сиёсий мақсадда қилинаётган ишлардир.

Бу ишларнинг ҳаммасини орқасида Владимир Путин тургани шубҳасиз. Дунёвий/секуляр давлат бўлган Россия бундай ишлар қилишга мажбур бўлаётгани – ўз мамлакатининг келажаги хавф остида эканнини Путин тушунаётгани ва ҳалокатдан қутилиш учун ақлли ишлар қилиш ўрнига, аслида Россининг келажагига болта урувчи ишлар қилиш учун ҳар нарсага тайёр эканлигини кўрсатади.

Хуллас, бугун Москва Халқаро Муносабатлар Давлат Университетида Александр Невский номи берилган черков очилди. Очилишда, табиий, Патриарх Кирилл қатнашди. Табиий, ўзини фош қилишдан қочган Путин очилишда қатнашмади.

Россияни православлаштиришнинг мақсадларидан бири Ислом фанатизми ва унинг натижаси бўлган ислом экстремизми ва терроризмига қарши туриш эканлиги ҳам шубҳасиз. Яқин келажакда провослав-исломий қарама-қаршилик кучайишини кутиш керак.