25 February 2016
21:39 - Қўшма Штатлар ИШИДга қарши курашни фаоллаштириш ҳаракатига тушибди, аммо буни “Ҳаракат”сиз қилиб бўлмайди
Американинг энг машҳур телеканалларидан бири CNN хабар қилишича, АҚШ ИШИДга қарши ижтимоий тармоқлар орқали курашни фаоллаштиришга қарор қилибди. Шу мақсадда Адлия вазирлигига Apple, Twitter, Snapchat, Facebook, MTV ва Buzzfeed тармоқларининг раҳбарлари чақирилибди, уларга Миллий Контртеррористик Марказ раҳбари Николас Расмуссен АҚШ маъмурияти (ҳукумати – “Ҳаракат”) ИШИДга қарши олиб бораётган фаолият ҳақида маълумот берибди ва, тахмин қилиш мумкинки, ҳамкорликка чақрибди.

Бу жуда ҳам керакли ва натижа берадиган иш, дейди мухбиримиз. Амо, ижтимоий тармоқларда олиб бориладиган ғоявий кураш қуруқ сўз бўлмаслиги керак, бунинг учун Ислом дини ва исломий терроризмнинг хатоларини айнан Исломнинг ҳақиқий тушунчалари ва Қуръонга асосланиб кўрсатиб бериш лозим. Ана ўшандагина, ИШИДчилар ҳам ўз қилаётган ишлари устида чуқурроқ ўйлашга ва хато йўлдан кетаётганларини тушунишга бошлайдилар.

Бу осон иш эмас, аммо бошқа йўл йўқ. Чунки, “Бирлик” лидери Абдураҳим Пўлат АҚШ Президентига ўтган йилнинг бошида йўллаган хатида ёзганидек: “ислом терроризмини куч билан енгиб бўлмайди”. Барак Обама бу сўзларни ўтган йили октябрь ойида БМТ Бош Ассамблеясидаги нутқида айнан такрорлаган эди.

Ҳозирча, айнан шу йўналишда амалий иш олиб бораётган ягона ахборот воситаси – “Ҳаракат” Агентлигидир. Шундай экан, ўз-ўзидан маълумки, АҚШ маъмуриятининг айнан “Ҳаракат” билан ҳамкорлик қилишдан бошқа йўли йўқ. Президент Барак Обаманинг командасидагилар бу ҳақиқатни қанча тезроқ тушуниб етсалар, ИШИД каби террорист ташкилотларнинг келажакда ҳам асосий нишони бўладиган америкаликларга шунча яхши бўлади.