05 February 2016
22:39 - Кутилган воқеа: ЕИнинг Россияга қарши санкциялари Қрим Украинага қайтарилмагунча бекор қилинмайди
Европарламентнинг 4 февраль куни Страсбургда қабул қилинган резолюциясида Европа Иттифоқи тарафидан Россияга қарши киритилган санкциялар Қрим Украинага қайтарилмагунча бекор қилинмаслиги айтилади. Россиянинг иқтисоди ЕИ, АҚШ ва Канада тарафидан киритилган санкциялар остида ўлмоқда. Ҳозирги оғир аҳволни тан олган Россия Президенти Владимр Путин ва Бош вазири Дмитрий Медведевнинг яқинда ҳамма нарса яхши бўлиши ҳақидаги гапларига россияликлар ҳам ишонаётганлари йўқ. Сўровномаларга кўра, иқтисодий аҳвол ёмонлашаётгани ва бундан ҳам ёмон бўлишини кутаётган русларнинг сони кун сайин ортиб бормоқда.

Демак, Европарламентнинг кечаги қарори Путин ва Медведев учун катта зарба бўлиши табиий.

Европарламент Европа Кенгаши Бош Котибининг махсус вакили Қримга бориб, у ердаги аҳвол билан танишиги кераклиги ҳақида ҳам резолюция қабул қилди. Махсус вакил Қримда қримтатарларнинг ҳуқуқлари бузилаётгани ҳақида маълумотларнинг ҳам ўрганиши ва бу ҳақда ҳисобот тақдим этиши керак.

Расмда – Мустафа Жамилўғли раҳбарлигидаги қиримтатарлар делегациясининг 2014 йили Европарламентда қабул қилиниши.