Коммерсантъ газетаси Кремлдаги номи айтилмаган манбага асосланиб хабар беришича, шу йил декбрь ойининг ўртасида Санкт-Петербургда ўтказиши режалаштирилаётган Туркия-Россия саммити, яъни Владимир Путин ва Ражаб Эрдўғоннинг учрашуви бекор қилинади. Россия тарафи бу ҳақда қарор қабул қилган, аммо у ҳали расман эълон қилинмаган.

Сурия-Туркия чегаралари яқинида туркманларни бомбардимон қилаётган Россия учоғи Туркия армияси тарафидан уриб туширилгандан кейин бундай саммит ўтказиб бўлмаслиги ўз-ўзидан маълум эди. Демак, Россиянинг бу ҳақдаги қарори яқинда очиқланса керак.

Аммо, Россия обрўсини туширмаслик учун Туркияга қарши анчагина қаттиқ сўзлар айтишига қарамасдан, аслида, бу воқеани ютиб юборашга тайёр эканлиги кўриниб турибди. Чунки, Туркия билан катта жанжал чиқариш, Ғарб билан шундоқ ҳам яхши бўлмаган алоқаларни янада ёмонлаштириш бўларди.

Шундай экан, Санкт-Петербургда саммит ўтказиб, Россия учоғининг Туркия томонидан уриб туширилиш воқеасига нуқта қўйса бўлмасмикан? Бундай қилиш осон бўлмайди. Лекин ақлли сиёсатчилар қилиб бўлмайдиган ишларни ҳам қила билишлари керак. Қолаверса, Россиянинг Ғарб билан қарама-қаршилиги барибир Россиянинг мағлубияти билан, Россия Федерациясининг парчаланиши билан тамом бўлади.