АҚШнинг машҳур USA Today газетаси "Турк диний ташкилотлари АҚШ конгрессменлар саёҳатлари пулини тўлади” номли мақола эълон қилди. Унда айтилишича, туркларнинг диний ҳаракати Конгресс аъзолари ва Конгресс ходимларининг Туркияга қилган 200 дан кўпроқ саёҳатлари ҳаражатларини яширинча қоплаган. Бу билан АҚШ Конгресси Вакиллар палатасининг қоидалари ва балки федерал қонунлар бузилган. Булар газета тарафидан ўтказилган текширишлар натижасида маълум бўлган.

Мақолада гап Фатхулла Гулен лидерлигидаги ҳаракат ҳақида кетаётгани, Туркия ҳукумати бу одамни Туркияда давлат тўнтариши қилишга уринишда айблаётгани айтилади. Бу ҳаракат, дейилади мақолада, бутун АҚШ ва дунё бўйлаб хусусий мактаблар очган, ўзининг оммавий ахборот воситаларига эга, Туркиядаги режим билан яқин алоқада бўлган, аммо охирги икки йилда уларнинг алоқалари бузилган. Шундан кейин Ражаб Эрдўғон Фатхулла Гуленни давлат ичида параллель давлат қуриш ва ҳукуматни қўлга олиш учун урунишда айбламоқда.

Газетанинг текширишлари кўрсатибдики, Фатхулла Гуленга тегишли ўнлаб ташкилотлар 2008 йилдан бери конгрессга оид саёҳатлар учун спонсорлик қилишган, бу хусусда керакли ҳужжатларни Конгрессга тақдим этишган, Конгресснинг қуйи палатаси Этика бўйича комитети бу саёҳатларни тасдиқлаган.

Аммо, USA Today газетасининг текширувчилари ҳужжатларнинг кўпи сохта эканлигини аниқлашибди. Саёҳатлар учун тўланган пул ўша спонсор ташкилотларининг давлатга топшириладиган ҳисоботларида умуман кўрсатилмаган экан. Газетада ёлғондакам спонсорларнинг пули билан Туркияга саёҳат қилган конгрессменларнинг исми ва уларнинг йўл кираси учун тўланган пуллларнинг миқдори келтирлар экан, гўёки спонсорик қилган ташкилотларнинг раҳбарлари бундай нарсани рад этаётганлари ҳам кўрсатиб берилган. Айтилишича, Фатхуллачилар ўша саёҳатлар учун спонсорлар номидан 2008 йилдан бери 800 минг доллар пул тўлашган.

Хуллас, ҳеч шубҳа йўқки, бу Фатхулла Гуленнинг ўзи ва “Хизмат” ҳаракати учун катта зарбадир. Зарба берувчилар газета орқасида яширингани ўртага чиқиб қолса, ҳайрон қолмаслик керак.

Яна бир қизиқ нарса шундаки, дейди “Бирлик” лидери Абдураҳим Пўлат, бу газетани кеча тасодифан кўриб қолишим билан Интернетга кирдим, Туркия газеталарининг сайтларида бу ҳақда ҳали ҳеч қандай хабар йўқлигини кўрдим. Ваҳолангки, улар Ғарбда, айниқса, АҚШ ахборот воситаларида Туркиянинг номи тилга олинса, уни дарҳол ўзларида эълон қилардилар. Менинг ҳеч қандай исботим йўқ, аммо аминманки, бу сенсацион мақола менинг АҚШ Президенти Барак Обамга ёзган хатимнинг яна бир натижасидир. Айнан менинг хатимдан кейин америкаликлар исломчиларга диқққатлироқ бўлишга бошладилар. Аминманки, ҳали бундай нарсалар кўп бўлади.